New Videos from Youtube
Showing posts with label Srilanka. Show all posts
Showing posts with label Srilanka. Show all posts

பண்டாரவளையில் விபத்து 45பேர் காயம்

பண்டாரவளை – உடமல்வத்த - ஐஸ்லப்பி பிரதேசத்தில் இன்று முற்பகல் இடம்பெற்ற பேருந்து விபத்தில் 45 பேர்வரை காயமடைந்துள்ளனர்.

இவர்கள் முதலில் பண்டாரவளை ஆதார வைத்தியசாலையில் அனுமதிக்கப்பட்டனர்

இதில் 11 பேர் பின்னர் தியத்தலாவ வைத்தியசாலைக்கு மாற்றப்பட்டனர்

அதிலும் கடுமையாக பாதிக்கப்பட்ட 3பேர் பதுளை பொதுவைத்தியசாலைக்கு மாற்றப்பட்டுள்ளனர்

அரச பேருந்து ஒன்றே பள்ளத்தில் வீழ்ந்து அனர்த்தத்திற்கு உள்ளானதாக தெரிவிக்கப்பட்டுள்ளது.

அட்டம்பிட்டியவிலிருந்து பண்டாரவளை நோக்கி இன்று 9.45 அளவில் பயணத்தை ஆரம்பித்த பேருந்து கட்டுப்பாட்டை இழந்த நிலையில் விபத்துக்குள்ளாதாக எமது செய்தியாளர் தெரிவித்தார்.

தடை நீக்கப்பட்டதால் புலிகள் திரும்பவும் வருவார்கள் ,பதறும் அமைச்சர்

தமிழீழ விடுதலைப் புலிகள் மீதான தடையை ஐரோப்பிய ஒன்றிய நீதிமன்றம் நீக்கியமையால் புலிகள் அமைப்பு சர்வதேச ரீதியில் மீளவும் செயற்படுவதற்கான வாய்ப்பு ஏற்படலாம். ஆனால், அதனை உறுதியாக சொல்ல முடியாது என்று அமைச்சரும் ஐக்கிய மக்கள் சுதந்திர கூட்டமைப்பின் பொதுச்செயலாளருமான சுசில் பிரேமஜயந்த தெரிவித்தார்.

கொழும்பிலுள்ள ஸ்ரீலங்கா சுதந்திர கட்சியின் தலைமையககத்தில் நேற்று திங்கட்கிழமை(20) நடைபெற்ற ஊடகவியலாளர் சந்திப்பின் போது, அவர் இதனை கூறினார்.

ஐரேப்பிய ஒன்றிய நீதிமன்றம், தமிழீழ விடுதலை புலிகள் மீதான தடையை நீக்கியுள்ளது. இலங்கையின் ஜனாதிபதியாக மஹிந்த ராஜபக்ஷ 2005ஆம் ஆண்டு பதவியேற்றார். ஜனாதிபதி மஹிந்த ராஜபக்ஷ பதவியேற்று ஒருவருடம் கடந்து அதாவது 2006 ஆம் ஆண்டு, ஐரோப்பிய ஒன்றிய நாடுகள், தமிழீழ விடுதலை புலிகள் அமைப்பின் மீது தடைவிதித்திருந்தது.

இதனையடுத்து புலம்பெயர் தமிழர் அமைப்புகள் தமிழீழ விடுதலை புலிகள் அமைப்பின் மீதான தடையை நீக்குமாறு ஐரோப்பிய ஒன்றிய நீதிமன்றத்தில் வழக்கு தாக்கல் செய்திருந்தன.

தற்போது தமிழீழ விடுதலை புலிகள் அமைப்பின் மீதான தடை ஐரோப்பிய ஒன்றிய நீதிமன்றத்தினால் நீக்கப்பட்டுள்ளது.

இவ்வாறு புலிகள் அமைப்பின் மீதான தடை நீக்கப்பட்டாலும் ஏனைய நாடுகளில் அத்தடை தொடர்ந்தும் உள்ளது. ஐரோப்பிய ஒன்றியத்தினுள் அடங்கும் 28 நாடுகளில் மாத்திரம் இந்த தடை நீக்கப்பட்டுள்ளது.

தடையை நீக்கியமையால் இந்த நாடுகளில் புலிகள் அமைப்பினை மீளக் கட்டியெழுப்பும் நடவடிக்கைகள் மேற்கொள்ளப்படலாம். புலம்பெயர் தமிழர்கள் புலிகளுக்கு ஆதரவாக மக்களிடம் நிதி திரட்டிவந்திருந்தனர். எதிர்காலத்தில் பலவந்தமாக நிதியை திரட்டலாம்.

இந்நிலையில், புலிகள் மீதான தடை நீக்கப்பட்டதையடுத்து இந்த நாடுகளில் மீண்டும் புலிகளுக்கு ஆதரவாக நிதிதிரட்டப்படும் அபாயம் காணப்படுகின்றது என்றார்.

இது தொடர்பில் அரசாங்கம் எந்தவிதமான நடவடிக்கைகளை மேற்கொள்ளப் போகிறது என்ற கேள்விக்கு பதிலளிக்கையில், இந்த விவகாரம் தொடர்பில் அரசாங்கம் சர்வதேச ரீதியில் இராஜதந்திர மட்டத்தில் தமது நடவடிக்கைகளை முன்னெடுக்கும்.

சில நாடுகளில் உள்ள சட்;டம் மற்றும் நீதி முறைக்கு அமைவாக தமிழீழ விடுதலை புலிகள் மீதான தடையை நீக்கலாம். இந்தியாவின் தமிழ்நாட்டு அரசியல்வாதிகள், புலிகள் மீதான தடையைநீக்குமாறு அந்நாட்டு அரசாங்கத்தை கோரியுள்ளனர்.

இறுதி தீர்மானம் அந்தந்த நாடுகளுடையது. எனினும், இலங்கையில் இந்த அமைப்பை 2009ஆம் முற்றாக நாம் தோல்வியடைய செய்தோம் என்றும் அவர் தெரிவித்தார்.

இதே வேளை, நாடு கடந்த தமிழீழ அமைப்பு தோன்றுவதற்கு 1983 ஆம் ஆண்டு ஏற்பட்ட கறுப்பு ஜூலை முக்கியமான காரணமாகும். அதன்போது தமிழர்களுக்கு இழைக்கப்பட்ட கொடுமைகளை அடுத்து இலட்சக்கணக்கான தமிழர்கள் வெளிநாடுகளுக்கு இடம்பெயர்ந்தனர்.

அப்போதைய அரசாங்கம் கறுப்பு ஜூலை கலவரத்தை தடுத்திருந்தால் புலிகள் அமைப்பு தோன்றியும் இருக்காது இனப்பிரச்சினையும் இந்தளவுக்கு விஷ்வரூபம் எடுத்தும் இருக்காது என்றும் அவர் கூறினார்.

இதேவேளை, யுத்தம் நிறைவுக்கு வந்ததன் பின்னர் 11,000 விடுதலைப்புலி உறுப்பினர்களை புனர்வாழ்வளித்து சமூகமயப்படுத்தியுள்ளோம். விடுதலைப் புலிகளின் முன்னாள் தலைவர்களில் ஒருவரான கே.பி என்றழைக்கப்படும் குமரன் பத்மநாதன் ஆயுதங்களை கீழே வைத்துவிடடு சமூகத்துடன் இணைந்துள்ளார் என்றும் அவர் கூறினார்.

தொடர்ந்து கைது செய்யப்படும் தேவியனின் குடும்ப உறுப்பினர்கள் , தாயையும் கைது செய்த புலனாய்வுத்துறை

தமிழீழ விடுதலைப்புலிகள் அமைப்பை மீளக்கட்டியெழுப்புவதற்கு முயன்றார் என்ற குற்றச்சாட்டில் சுட்டுக்கொல்லப்பட்ட தேவியன் என்றழைக்கப்படும் சுந்தரலிங்கம் கஜீபன் என்பவரின் தாயாரான சுந்தரலிங்கம் ரஞ்சித மலர் (வயது 57), பண்டாரநாயக்க சர்வதேச விமான நிலையத்தில் தடுத்து வைக்கப்பட்டுள்ளார்.

அவர், கனடாவை நோக்கி இன்று செவ்வாய்க்கிழமை காலை புறப்பட்டு செல்வதற்கு முயன்றபோதே அரச புலனாய்வு பிரிவினரால்; தடுத்துவைக்கப்பட்டுள்ளார் என்று செய்தி தெரிவிக்கின்றது.

யாழ்ப்பாணம், சாவக்கச்சேரியிலிருந்து இன்று செவ்வாய்க்கிழமை அதிகாலை காலை 1மணியளவில் கட்டுநாயக்க விமான நிலையத்துக்கு வருகைதந்த அவர், அதிகாலை 4.45க்கு பயணிக்கவிருந்த கட்டார் விமான சேவைக்கு சொந்தமான கிவ்.ஆர் 683 விமானத்தின் மூலம் டோஹா ஊடாக கனடாவுக்கு செல்லவிருந்ததாக தெரிவிக்கப்படுகின்றது.

அவர் வைத்திருந்த கடவுச்சீட்டில் ஆறுவருடங்களுக்கான கனடா விஸா குத்தப்பட்டுள்ளது.

எனினும், வைத்திருந்த ஆவணங்களில் போலியான ஆவணங்கள் இருப்பதாக குடிவரவு மற்றும் குடியகல்வு திணைக்களத்தின் அதிகாரிகள், அரச புலனாய்வு பிரிவினரின் கவனத்துக்கு கொண்டுவந்ததையடுத்தே அவரது பயணம் தடுக்கப்பட்டுள்ளது என்றும் அச்செய்தி தெரிவித்துள்ளது.

அவரும், புலிகள் அமைப்பின் புதிய தலைவர் என்று சொல்லப்பட்ட கோபி உள்ளிட்ட மூவருக்கும் இராணுவத்துக்கும் இடையில் அநுராதபுரம் பதவிய காட்டுப்பகுதியில் இடம்பெற்ற மோதலில் மூவரும் சுட்டுக்கொள்ளப்பட்டனர்.
இதனையடுத்து தேவியனின் தாயாரான் ரஞ்சித மலர், பயங்கரவாத புலனாய்வு பிரிவினரால் கைது செய்யப்பட்டு விசாரணைக்கு உட்படுத்தப்பட்டு பின்னர் விடுவிக்கப்பட்டார்.

இதேவேளை, கோபி என்றழைக்கப்படும் செல்வநாயகம் கஜீபனின் மனைவியான கஜீபன் சர்மிளா, ஒக்டோபர் மாதம் 6ஆம் திகதி நாட்டை விட்டு வெளியேறுவதற்கு முயன்றபோது கட்டுநாயக்க சர்வதேச விமான நிலையத்தில் வைத்து தடுக்கப்பட்டார் என்பது குறிப்பிடத்தக்கதாகும்.

பல்கலைக்கழக மாணவர்கள் மீது பொலிஸார் கண்ணீர் புகை பிரயோகம்

தனியார் பல்கலைக்கழகம் மற்றும் கல்வித்துறை சீரழிவுக்கு எதிராக ஆர்ப்பாட்டப் பேரணி நடத்திய பல்கலைக்கழக மாணவர்கள் மீது பொலிஸார் கண்ணீர் புகை பிரயோகம் மற்றும் நீர்த்தாரைப் பிரயோகம் செய்துள்ளனர். இதனால் லிப்டன் சுற்றுவட்டப் பகுதியில் பதற்ற நிலை ஏற்பட்டுள்ளது.

கொழும்பை அதிர வைத்த பல்கலைக்கழக மாணவர்கள்

கல்வித்துறையில் காணப்படும் சீரழிவுகளுக்கு எதிராக பல்கலைக்கழக மாணவர்களினால் இன்று ஆர்ப்பாட்டம் ஒன்று முன்னெடுக்கப்பட்டது.

பேரணி காரணமாக தாமரைத் தாடகம், நகரமண்டபம் ஹோர்ட்டன் பிளேஸ் பகுதிகளில் போக்குவரத்து நெரிசல் ஏற்பட்டது.

அரசாங்கத்தையும் நாட்டுத் தலைவரையும் விமர்சிக்கும் வகையில் ஆர்ப்பாட்டப் பேரணி ஏற்பாடு செய்யப்பட்டிருந்தது.

இலசவ கல்வி அழிப்பு, தனியார் பல்கலைக்கழகம் அமைப்பு உள்ளிட்ட பல விடயங்களுக்கு எதிர்ப்பு தெரிவித்து பல்கலைக்கழக மாணவர்கள் ஆர்ப்பாட்டப் பேரணியில் ஈடுபட்டதுடன் கோஷங்களையும் எழுப்பினர்.






தேர்தலில் குதிக்கிறது பொதுபல சேனா..!,ஜனாதிபதி யார் ?

ஜனாதிபதித் தேர்தல் அல்ல பொதுத் தேர்தல் ஒன்றையே தாம் எதிர்பார்த்துக் காத்திருப்பதாக பொதுபல சேனா அமைப்பின் செயலாளர் ஞானசார தேரர் தெரிவித்துள்ளார்.

தங்களுக்கு ஜனாதிபதித் தேர்தல் பயனில்லை என்றும் எதிர்வரும் பொதுத் தேர்தலில் பிக்குகள் அல்லாத தலைவர்களை முன்னிறுத்தி போட்டியிட தீர்மானித்துள்ளதாகவும் கொழும்பில் இன்று (21) இடம்பெற்ற ஊடகவியலாளர் சந்திப்பில் ஞானசார தேரர் குறிப்பிட்டார்.

பொதுபல சேனா என்ற பெயரில் அல்லது வேறு சிங்கள பௌத்த கட்சி பெயரில் தேர்தலில் போட்டியிடவுள்ளதாக அவர் கூறினார்.

தமது அமைப்பினால் அறிவிக்கக்கூடி பொது வேட்பாளர் ஒருவரை உள்ளதாகவும் ஆனால் அவரது பெயரை இப்போது கூற முடியாது என்றும் சரியான நேரத்தில் அதனை வெளியிட உள்ளதாகவும் தேரர் குறிப்பிட்டார்.

அரசியல் ரீதியில் ஜாதிக ஹெல உறுமயவுடன் இணைந்து செயற்பட முடியும் என்றும் அவர்களது யோசனை திருப்தி அளிப்பதாகவும் நிறைவேற்று ஜனாதிபதி இருக்க வேண்டும் என கருதவில்லை என்றும் ஞானசார தேரர் தெரிவித்துள்ளார்.

நிறைவேற்று அதிகாரம் கொண்ட ஜனாதிபதி பதவி சரியான ஒருவர் கையில் சென்றடைய வேண்டும் என்றும் தவறானவரிடம் சென்றால் பிரச்சினை என்றும் அவர் சுட்டிக்காட்டியுள்ளார்.

நாட்டின் சில கடலோரங்களில் இடியுடன் கூடிய மழை பெய்யலாம்?

நாட்டின் பெரும்பாலான கடலோரப்பகுதிகளில் இன்று (21) மழையுடன் காற்றின் வேகம் அதிகரிக்கலாம் என வானிலை அவதான நிலையம் தெரிவித்துள்ளது.


அத்துடன் சில கடலோரங்களில் இடியுடன் கூடிய மழை அதிகளவில் காணப்படலாம். மேலும் தென்மேற்கு கடலோரப்பகுதிகள் அதிகளவில் கொந்தளிப்புடன் காணப்படலாம் எனவும் வடக்கு கடலோரங்களில் இடியுடன் கூடிய மழை பெய்யலாமெனவும் தெரிவிக்கப்பட்டுள்ளது.

தென்மேற்கு கரையோரமாக மணிக்கு 30-40 கிலோ மீற்றர் வேகத்தில் காற்று வீசலாம் எனவும் வானிலை அவதான நிலையம் தகவல் வெளியிட்டுள்ளது.காலியிலிருந்து பொத்துவில் ஊடாக மாத்தறையிலிருந்து கொழும்பு, முல்லைத்தீவு, மன்னார், சிலாபம், திருகோணமலை மற்றும் காங்கேசன்துறை ஆகிய பகுதிகளில் மணிக்கு 50-60 கி.மீ அளவில் காற்று வீசலாம் என எதிர்பார்க்கப்படுவதுடன் மழை பெய்வதற்கான சாத்தியங்களும் காணப்படுவதாக வானிலை அவதானிப்பு நிலையம் தெரிவித்துள்ளது.

இதன்காரணமாக மீனவர்கள் அவதானமாக செயற்படுமாறு வேண்டப்படுகின்றனர்.

வடமாகாண சபைக்குள் பிளவு ?

இலங்கையில் இனப்படுகொலை நடைபெற்றுள்ளது என்ற பிரேரணை வடக்கு மாகாணசபையில் ஏற்கப்பட்டு விவாதம் நடத்தப்பட வேண்டும் என்றும், இல்லையேல் தமது உறுப்பினர் பதவியைத் துறந்து போராட்டத்தில் ஈடுபடப் போவதாகவும் மாகாணசபை உறுப்பினர் எம்.கே.சிவாஜிலிங்கம் யாழ்ப்பாணத்தில் செய்தியாளர்களிடம் கூறியுள்ளார்.


'தமிழ் மக்களுக்கு எதிராக அரசாங்கம் தொடர்ச்சியாக மேற்கொண்டு வருகின்ற பல்வேறு நடவடிக்கைகளின் மூலம் இங்கு இனப்படுகொலை நடைபெற்றுள்ளது என்பதைத் தெரிந்து கொண்டும், வட மாகாணசபை அது தொடர்பான தனது பிரேரணையை கடந்த ஐந்து மாதங்களாக ஏற்றுக்கொள்ள மறுத்து வருகிறது என்று சிவாஜிலிங்கம் குற்றம் சுமத்தியிருக்கின்றார்.

'இறுதி யுத்தத்தின்போது இடம்பெற்ற மனித உரிமை மீறல்கள் தொடர்பாக ஐநா மனித உரிமைகள் பேரவை நடத்திவருகின்ற விசாரணைகள் இம்மாதம் 31 ஆம் திகதியுடன் முற்றுப் பெறவுள்ள இந்த சந்தர்ப்பத்தில்' இந்தப் பிரேரணை முக்கியத்துவம் பெற்றிருப்பதாக அவர் செய்தியாளர்களிடம் சுட்டிக்காட்டியுள்ளார்.

இது தொடர்பாக கருத்து வெளியிட்ட வடக்கு மாகாணசபையின் அவைத் தலைவர் சி.வி.கே.சிவஞானம், சிவாஜிலிங்கத்தின் பிரேரணையானது தேசிய அளவில் முக்கியத்துவம் மிக்கது என்பதால் தன்னால் அது தொடர்பில் முடிவெடுக்க முடியாது என்பதற்காக, தமிழ்த் தேசியக் கூட்டமைப்பின் தலைமையின் கவனத்திற்கு அதனைக் கொண்டு வந்ததாகக் கூறினார்.

கூட்டமைப்பின் தலைமை இது தொடர்பாக அதன் இணைப்புக்குழு கூட்டத்திலும் உயர்மட்டக் கூட்டத்திலும் ஆராய்ந்து 11 விடயங்களை உள்ளடக்கி முதலமைச்சருக்குத் தெரிவித்திருந்ததாகவும் சிவஞானம் கூறினார்.

'கூட்டமைப்பின் உயர்மட்டக் கூட்டத்தில், இனப்படுகொலை என்ற சொற்பதம் தொடர்பில் எந்தப் பிரச்சினையும் இல்லை என்று தெரிவித்திருந்த தலைவர் சம்பந்தன், இந்தப் பிரேரணையைக் கொண்டு வருவதற்கான சமயம் இதுவல்ல என கூறியிருந்தார். இதுதான் கூட்டமைப்பின் நிலைப்பாடும் ஆகும்' என்றார் சிவஞானம்.

முல்லைத்தீவுப் பகுதியில் மதுபோதையில் வாகன ஓட்டுனர்கள்

முல்லைத்தீவின் பல பிரதேசங்கள் போக்குவரத்துப் பொலிசாா் நடாத்திய வீதிச் சோதனையின் போது மதுபோதையில் ஆவணங்கள் இல்லாமல் வாகனம் செலுதிய 12 பேருக்கு எதிராக பொலிசாா் நீதிமன்றில்வழக்குத் தொடுத்தனா்.

இவா்களுக்கு முல்லைத்தீவு நீதிமன்ற நீதிபதி மாணிக்கவாசகர் கணேசராஜா ஒரு லட்சம் ரூபா தண்டப்பணம் கட்டுமாறு தீா்ப்பளித்தாா்.

இதே வேளை மதுபோதையில் வாகனம் செலுத்தி கலகம் விளைவித்தவர்களின் சாரதி அனுமதி பத்திரம் 2 மாதங்களுக்கு இடைநிறுத்தி வைக்குமாறும் உத்தரவிடப்பட்டுள்ளது

காணி விபரங்களைத் திரட்டும் ராணுவம்

பயங்கரவாதம் காரணமாக வடமாகாணத்தில் தமது காணி, வீடுகளை இழந்த சிங்கள, தமிழ் மற்றும் முஸ்லிம் மக்களிடமிருந்து பாதுகாப்பு மற்றும் நகர அபிவிருத்தி அமைச்சு விபரங்களை கோரியுள்ளது.

இதுதொடர்பில் அவ்வமைச்சு விடுத்துள்ள அறிக்கையில் மேலும் தெரிவிக்கப்பட்டுள்ளதாவது,

கடந்த 1980 ஆம் ஆண்டு வட மாகாணத்தில் பயங்கரவாதம் காரணமாக காணி மற்றும் வீடுகள் இழந்தவர்கள் கீழ் குறிப்பிடப்படும் விபரங்களுடன் விண்ணப்பபடிவத்தை தயாரித்து பாகாப்பு மற்றும் நகர அபிவிருத்தி அமைச்சு, இலக்கம் 15/5 பாலதக்ஷ மாவத்தை, கொழும்பு- 3 என்ற முகவரிக்கு தபால் மூலம் அனுப்பிவைக்க முடியும். (தற்போது குடியேற்றப்பட்டிருக்கும் காணிகள் மற்றும் சொத்துக்கள் தொடர்பிலான முறைப்பாடுகள் தொடர்பில் கவனம் செலுத்தப்படமாட்டாது என்பதை கவனத்தில் கொள்ள வேண்டும்)

இது தொடர்பில் முறைப்பாடு செய்பவர்கள் தமது பெயர், முகவரி, தொலைபேசி இலக்கம், மின்னஞ்சல் முகவரி, கிராம உத்தியோகத்தர் பிரிவு, பிரதேச செயலக பிரிவு மற்றும் மாவட்டம் ஆகிய விபரங்களையும் பயங்கரவாதம் காரணமாக கைவிடப்பட்ட காணி மற்றும் வீடு தொடர்பில் விபரங்கள் வழங்கும் போது பெயர், உரிமையாளரின் பெயர், கைவிடப்பட்ட அல்லது இடபெயர்ந்த ஆண்டு, முகவரி, கிராம உத்தியோகத்தர் பிரிவு, மாவட்ட பிரதேச செயலக பிரிவு ஆகிய விபரங்கள் உள்ளடக்கிய விண்ணப்பப்படிவத்தை வடிவமைத்து அனுப்பி வைக்க வேண்டும்.

மேலும், இவற்றை உறுதிப்படுத்தும் ஆவணங்கள் இருக்கும் பட்சத்தில் அவற்றையும் அந்த படிவத்துடன் இணைத்து அனுப்பி வைக்கலாம் என்று பாதுகாப்பு மற்றும் நகர அபிவிருத்தி அமைச்சின் ஊடக மையத்தின் பணிப்பாளர் பிரிகேடியர் ருவன் வணிகசூரிய தெரிவித்துள்ளார்.

ஐக்கிய தேசியக் கட்சியின் மீது புலி முத்திரை குத்தி அரசாங்கம் மீண்டும் தோல்வியான முயற்சி

எதிர்க்கட்சித் தலைவரின் பிரித்தானிய பயணம் காரணமாகவே ஐரோப்பிய ஒன்றியம் விடுதலைப் புலிகளின் தடையை நீக்கியதாக அரசாங்க ஊடகங்கள் மேற்கொண்டு வரும் பிரசாரங்கள் முற்றிலும் பொய்யானது என ஐக்கிய தேசியக் கட்சியின் தலைமைத்துவச் சபையின் தலைவரான பாராளுமன்ற உறுப்பினர் கரு ஜயசூரிய தெரிவித்துள்ளார்.

விடுதலைப் புலிப் பயங்கரவாதிகளுடன் புரிந்துணர்வுடன் அரசியலில் ஈடுபட்டு வரும் தரப்பினரே ஐக்கிய தேசியக் கட்சியின் மீது புலி முத்திரை குத்தி வருகின்றனர்.

ஐக்கிய தேசியக் கட்சியின் மீது புலி முத்திரை குத்தி அரசாங்கம் மீண்டும் தோல்வியான முயற்சியில் இறங்கியுள்ளது.

ஐக்கிய தேசியக் கட்சியின் தலையீடு காரணமாகவே ஐரோப்பிய ஒன்றியம் புலிகளின் தடையை நீக்கியதாக கூறி அரசாங்கம் பிரசார யுத்தம் ஒன்றை ஆரம்பித்துள்ளது.

ரணில் விக்ரமசிங்கவின் பிரித்தானிய விஜயத்தை அடிப்படையாக கொண்டு அரசாங்கம் இந்த பொய்யை சமூகமயப்படுத்தி வருவதாகவும் கரு ஜயசூரிய வெளியிட்டுள்ள அறிக்கையில் கூறியுள்ளார்.

குறிகட்டுவானில் இருந்து கொழும்புக்கான போக்குவரத்து சேவை

தீவக மக்களின் நலனைக் கருத்திற் கொண்டு குறிகட்டுவானில் இருந்து கொழும்புக்கான போக்குவரத்து சேவை நேற்று முதன் முதலாக ஆரம்பிக்கப்பட்டுள்ளது. அதற்கமைய அனலைதீவு, நெடுந்தீவு, நயினாதீவு உள்ளிட்ட தீவகப்பகுதி மக்களுக்கு போக்குவரத்திற்கு இலகுவாக இருக்கும். தற்போது வடபிராந்தியத்திற்கு என 70 பேருந்துகள் வழங்கப்பட்டுள்ள நிலையில் இந்த புதிய சேவை மேற்கொள்ளப்பட்டுள்ளது.


எனவே தினமும் மாலை 6.30 குறிகட்டுவானில் இருந்து புறப்படும் குறித்த பேருந்து ஊர்காவற்றுறை , யாழ்.பிரதான பேருந்து தரிப்பிடம் ஊடாக குருநாகல் பாதை வழியாக கொழும்பு கோட்டை மத்திய பேருந்து நிலையத்தை அடைந்து அங்கிருந்து பம்பலப்பிட்டி, வெள்ளவத்தை, தெகிவளை, கல்கிச்சை ஊடாக இரத்மலானையை சென்றடையும். அதேபோல் இரவு 8 மணிக்கு இரத்மலானையில் இருந்து புறப்படும் பேருந்து குறிகட்டுவானை வந்தடையும்.


இதேவேளை, நேற்று சுபநேரத்தில் குறித்த பேருந்திற்கான பணயச்சீட்டினை அமைச்சர் டக்ளஸ் தேவானந்தா பெற்றுக் கொண்டதுடன் சேவையினையும் ஆரம்பித்து வைத்தார்.



முல்லைத்தீவில் 10 மாதக் குழந்தையின் உயிரைப் பறித்த சிறிய கல்

முல்லைத்தீவு மல்லாவி 4 ஆம் யூனிற் பகுதியில் 10 மாதங்கள் நிரம்பிய குழந்தை தொண்டையில் சிறிய கல் ஒன்று சிக்கியதால் உயிரிழந்த சம்பவம் அந்தப் பிரதேசத்தை சோகத்தில் ஆழ்த்தியுள்ளது.

லிகிதன் தனுசிகா என்ற 10 மாதக் குழந்தை சிறுவர்களுடன் அவரது வீட்டு முற்றத்தில் விளையாடிக் கொண்டிருந்த போது சிறிய கல் ஒன்றை விழுங்கியுள்ளது.

இந்த சம்பவம் இடம்பெற்றபோது குழந்தையின் தாயார் மாடு கட்டுவதற்காக அயல் காணிக்கு சென்றிருந்தமை தெரியவந்துள்ளது.

குழந்தைகளின் கூக்குரலை கேட்டு வந்த தாயார் தனுசிகாவை மல்லாவி வைத்தியசாலைக்கு கொண்டு சென்ற போதும் அவரது உயிரை காப்பாற்ற முடியாமற்போயுள்ளதாக எமது பிராந்திய செய்தியாளர் கூறினார்.

குழந்தையின் உயிரிழப்பு தொடர்பில் இன்று வவுனியா வைத்தியசாலையில் மேற்கொள்ளப்பட்ட பிரேத பரிசோதனையின் போதே தனுசிகாவின் உயிரிழப்பிற்கான காரணம் தெரிய வந்துள்ளது.

சுவாசக்குழாயில் கல் சிக்கி மூச்சுத்திணறல் ஏற்பட்டதன் காரணமாக குழந்தை உயிரிழந்துள்ளதாக பிரேத பரிசோதனையில் உறுதி செய்யப்பட்டுள்ளது.

பல்கலைக்கழக மாணவர்களால் மீண்டும் சத்தியாகிரகப் போராட்டம்

முகாம்களை அகற்றிய போதிலும் சப்ரகமுவ பல்கலைக்கழக மாணவர்களால் நேற்றைய தினம் மீண்டும் ஆரம்பிக்கப்பட்ட சத்தியாகிரகப் போராட்டம் தொடர்ந்து முன்னெடுக்கப்படுகின்றது.


பலாங்கொடை – கொழும்பு பிரதான வீதியின் பம்பஹின்ன முச்சந்தியில் பல்கலைக்கழக மாணவர்களால் நேற்று ஆரம்பிக்கப்பட்ட சத்தியாக்கிரக போராட்டத்தில் பிரதேச மக்களும் இணைந்துக் கொண்டனர்.

பம்பஹின்ன முச்சந்திக்கு நேற்று இரவு வந்த பெருந்திரளான மாணவர்கள் அங்கு சத்தியாகிரகத்தில் ஈடுபட்டவர்களுக்கு ஆதரவு தெரிவித்தாக எமது பிராந்திய செய்தியாளர் தெரிவித்தார்.

குறித்த பகுதியில் பாதுகாப்பு பலப்படுத்தப்பட்டிருந்ததாகவும் எமது பிராந்திய செய்தியாளர் குறிப்பிட்டார்.

சத்தியாகிரகத்திற்காக அமைக்கப்பட்ட முகாம்கள் நீதிமன்ற உத்தரவுக்கு அமைய கடந்த வாரம் அகற்றப்பட்டமை குறிப்பிடத்தக்கது.

வடமாகாண மக்களின் வாக்குகளை புறக்கணித்துவிட்டு, ஜனாதிபதி பதவியை எட்ட முடியாது.விக்னேஸ்வரன்

வடமாகாண மக்களின் வாக்குகளை புறக்கணித்துவிட்டு, ஜனாதிபதி பதவியை மூன்றாம் முறை எட்ட முடியாது. ஆகவே, வடமாகாண மக்களை எப்படியாவது தன் பக்கம் இழுக்க வேண்டும் என்ற எண்ணத்துடன்தான் ஜனாதிபதி தாராள சிந்தையுடைய கொடையாளியாக மாறியுள்ளார்' என வடமாகாண முதலமைச்சர் சி.வி.விக்னேஸ்வரன் கூறினார்.

முள்ளிக்குளம் பகுதியில் தலா 50 ஆயிரம் ரூபாய் பெறுமதியுடைய 82 தற்காலிக வீடுகள் அமைக்கும் திட்டத்துக்கான அடிக்கல் நாட்டு விழா ஞாயிற்றுக்கிழமை (19) இடம்பெற்றது. இந்நிகழ்வில் கலந்துகொண்டு உரையாற்றுகையிலேயே முதலமைச்சர் மேற்கண்டவாறு கூறினார்.


அவர் அங்கு மேலும் கூறியதாவது,

'இரண்டு வருடங்களாக எமது மக்களுக்கு வழங்காது இடைநிறுத்தி வைக்கப்பட்ட காணி அனுமதிப்பத்திரங்கள், திடீரென்று மக்களைப் போய்ச் சேர்கின்றன என்றால், அதற்கு காரணம் என்ன?. மக்களின் ஆபரணங்களை 5 வருடங்களின் பின்னர் திடீரென்று வெளிக்கொண்டு வரும் தார்ப்பரியம் என்ன?.

வடமாகாண மக்களின் வாக்குகளை புறக்கணித்துவிட்டு மஹிந்த ராஜபக்ஷவால், ஜனாதிபதி பதவியை மூன்றாம் முறை எட்ட முடியாது. புகையிரத பாதையை நிர்மாணித்து தந்தது இந்திய அரசாங்கம் என்றும், வன்னியில் வைத்தியசாலையை அமைத்து கொடுத்தவர்கள், பசுபிக் பிராந்திய அமெரிக்க கடற்படையினர் என்றும் எமது மக்களுக்கு நன்றாக தெரியும்.

சுயநலங்கருதி சும்மா இருந்த ஜனாதிபதி, சுறுசுறுப்பாக வடக்கு வந்து சுற்றுலா மேற்கொண்டுவிட்டுச் சென்றுள்ளார். நாம் பதவியில் இருப்பது எந்தளவுக்கு அரசாங்கத்தை நிலை குலைய வைத்துள்ளது என்பது இதிலிருந்து தெரிந்து கொள்ளலாம். நாம் வெறுமனே பதவியில் இருந்தாலே போதும், அரசாங்கம் எமது மக்களுக்கு வாரித்தரும்.

வட, கிழக்கு மாகாணங்களில் படையினர் பெருவாரியாக அரசாங்கத்தால் நிலை நிறுத்தப்பட்டுள்ளாதால் எமது மக்கள் படும் அவலத்தையும் அவதியையும் எடுத்தியம்பும் ஒரு நிகழ்வாக இன்றைய இந்த நிகழ்வு அமைந்துள்ளது.

முள்ளிக்குளம் பகுதியில் இருந்து கடந்த ஏழு வருடங்களுக்கு முன்னர் இடம்பெயர்ந்த எம்மக்கள் தமது சொந்த இடங்களுக்கு திரும்பி சென்று குடியேற முடியாத ஒரு நிலையை இருக்கின்றது.

இவர்களின் பலகால வாழ்விடங்களை விட்டு வெளியேற படையினர் மறுக்கின்றனர். எங்கு சென்றாலும் இப்பொழுது இராணுவ பிரசன்னத்தையும் அவர்கள் முகாம்களையும் தான் பார்க்க வேண்டிய ஒரு நிர்ப்பந்தம் காணப்படுகின்றது.

நேற்று இரணைமடு குளத்தை பார்வையிட சென்றேன். அங்கும் இராணுவம். சென்ற கிழமை ஈச்சிலவக்கை சென்றேன். அங்கும் இராணுவம். எங்கும் இராணுவம். இவர்கள் எம் மண்ணில் நீடித்து நிற்பதால் பல அவலங்களை நாம் எதிர்நோக்கி வருகின்றோம்.

நீர் பற்றாக்குறை, நீரில் அசுத்தம் கலத்தல் போன்றவை கூட படையினரின் பிரசன்னத்தால் ஏற்பட்டுவரும் விளைவுகளே என்று சென்ற சில நாட்களுக்கு முன்னர் கருத்து தெரிவிக்கப்பட்டது.

படையினர் எதற்காக மக்களை வசீகரிக்க செயற்திட்டங்கள் வகுத்து செயலாற்றுகின்றார்கள். அவர்களை வெளியேறுமாறு வடமாகாணசபை கேட்டுள்ளது. தாம் தொடர்ந்து இங்கு இருக்க வேண்டும் என்றால் எமது மக்களின் மனத்தை குளிர வைக்க வேண்டும்.

பலதை கொடுத்தும் பயம் காட்டியும் தேர்தலில் தமது பங்காளர்களை நிறுத்தியும் மக்கள் தங்களுக்கு வாக்களிக்காத படியினால் எப்படியாவது எமது மக்கள் மனதை மாற்ற வேண்டும் என்று மானியங்களை வழங்கி வருகின்றார்கள் படையினர்.

நாங்கள் பதவியில் இருக்கும்வரை அவர்கள் தொடர்ந்து பலதை உங்கள் நன்மைக்காக செய்து வருவார்கள். ஏனென்றால், அவர்களுக்கு எமது வாக்குகள் வேண்டும். ஏன் அவர்கள் பதவியில் இருந்தால் அவற்றை செய்ய மாட்டார்களா என்று கேட்பீர்கள்.

செய்வார்கள் ஆனால் முழுமையாக வடமாகாணத்தை சிங்கள நாடாக மாற்றி செயற்படுவார்கள். நாம் இருப்பதால்த்தான் அவர்கள் சென்ற ஐந்து வருடங்கள் தான்தோன்றித்தனமாய் செய்து வந்தவற்றை சற்றுத்தளர்த்தி தவிர்த்து வருகின்றார்கள்.

நாம் இருப்பதால் இங்கு பலர் செய்த ஊழல்கள் அம்பலத்திற்கு வந்து கொண்டிருக்கின்றன. மக்களின் பணத்தை எவ்வாறு கொள்ளை அடித்தார்கள் என்பது வெளிவந்து கொண்டிருக்கின்றது.

நாமிருந்தால் ஊழலின்றி செயற்பட வேண்டிய ஒரு கடப்பாடு எல்லோருக்கும் எழுந்துள்ளது. நாம் 3 விதங்களில் எமக்கு வேண்டியவற்றை பெறலாம்.

ஒன்று வன்முறை. ஆனால் வன்முறை மேலும் வன்முறைக்கே வித்திடும். இரண்டு வலிய சென்று சரணடைந்து எமது வாழ்வை விருத்தி செய்வது. என்றென்றும் இவ்வாறு நலன் பெறுபவர்கள் அடிமைகள் என்றே கணிக்கப்படுவார்கள்.

மூன்றாவது அப்பழுக்கற்ற கொள்கைகளை முன்வைத்து எமது தேவைகளை கூறிப்பெற எத்தனிப்பது. இது காலம் போகும். ஆனால் காலக்கிரமத்தில் நன்மை பயக்கும். நாம் இதைத்தான் செய்து வருகின்றோம். வன்முறையை கண்டித்துள்ளோம்.

வருந்தி அழைத்தாலும் எமது வலுவான கொள்கைகளில் இருந்து வழுவாது எமது நடவடிக்கைகளில் ஈடுபட்டுள்ளோம். ஆகவே, வடமாகாணம் எந்த விதத்திலும் நன்மை பெறப்போவது நிச்சயமே. எமது வருங்காலம் நல்ல காலமாக அமையும் என முதலமைச்சர் மேலும் கூறினார்.

இந்த தற்காலிக வீடுகளும், நடுத்தர வகையான வீடுகள். சீமெந்தினால் அமைக்கப்பட்ட தளத்தின் மீது இரண்டு வரிகள் கற்கள் அடுக்கி சுவர்கள் அமைத்து, அதன் மேல் கிடுகு மூலம் மறைப்பு செய்யப்பட்டு, கூரைக்கு தகரம் இடப்படவுள்ளது.

இரண்டு அறைகள் விறாந்தை உள்ளடங்கலாக இந்த வீடுகள் அமைக்கப்படுகின்றன. மூன்று வாரத்திற்குள் இந்த வீடுகள் அமைத்து முடிக்கப்படவுள்ளது.

உயிருக்கு போராடும் இளம்பெண்! உயிர்காக்க நிதியின்றி திணறும் பெற்றோர்

இந்தியாவின் தமிழ்நாடு மாநிலத்தில் உள்ள சிவகங்கை மாவட்டம் ஒக்கூர் இலங்கைத் தமிழ் அகதி முகாமில் வசிக்கும் ரவீந்திரன் – பரமேஸ்வரி தம்பதியினரின் மகளான 21 வயதான புவனேஸ்வரிக்கு இரண்டு கிட்னிகளும் செயலிழந்து விட்டன.

உடனடியாக மாற்றுக் கிட்னி பொருத்தினால் தான் பிள்ளையை உயிர்பிழைக்க வைக்க முடியும் என மருத்துவர்கள் தெரிவித்து விட்டனர். குறித்த கிட்னி மாற்று அறுவைச் சிகிச்சைக்கு மொத்தமாக 5 இலட்சம் ரூபாய் இந்தியப் பணம் செலவாகும் என சென்னையில் உள்ள ஸ்டான்லி மருத்துவமனை கூறியுள்ளது.


நாளாந்தம் பெயிண்டிங் வேலை செய்யும் கூலித் தொழிலாளித் தந்தையான ரவீந்திரன், தன் மகளின் உயிரைக் காக்க உறவினர்கள், நண்பர்களிடம் சென்று தன்னால் முடிந்தளவு இரண்டு இலட்சம் ரூபாய்களைத் திரட்டி உள்ளார். அவரால் மேற்கொண்டு எதுவும் செய்ய முடியவில்லை.

இந்நிலையில் புவனேஸ்வரியின் உடல்நிலை மிகவும் மோசமாகி இன்று 18.10.2014 மருத்துவமனையில் அவசரமாக சேர்த்துள்ளார்கள்.

உடனடியாக கிட்னி மாற்று அறுவைச் சிகிச்சை செய்தாக வேண்டிய நிலையில் அந்த பெற்றோர்கள் உங்கள் உதவியை வேண்டி நிற்கின்றார்கள்.

சிறிது தாமதித்தாலும் பெண்பிள்ளையின் உயிருக்கு ஏதும் ஆகிவிடும் நிலையில் பரிதவிக்கின்றது புவனேஸ்வரியின் குடும்பம்.

சொந்த நாட்டில் இருந்து துரத்தியடிக்கப்பட்டு, தமிழ்நாட்டின் ஒக்கூர் அகதிகள் முகாமிலும் கஷ்டத்தின் மேல் கஷ்டங்களை அனுபவித்துக் கொண்டிருக்கும் இந்தக் குடும்பத்தக்கு விழுந்த பேரிடி தான், மகளுக்கு கிட்னி செயலிழந்து விட்டது என்கிற செய்தி.

பிள்ளையின் உயிர்காக்க உதவிக்கரம் நீட்டுவீர்களா?

முடிந்தளவு இந்தச் செய்தியினை அனைவரிடமும் பகிர்ந்து தயவு செய்து இந்தப் பிள்ளையின் உயிர் காக்க உதவுங்கள். புவனேஸ்வரியின் மருத்துவ ஆவணங்கள் இணைக்கப்பட்டுள்ளன.

பாதிக்கப்பட்ட பிள்ளையின் அம்மாவின் கைத்தொலைபேசி இலக்கம்: 009159148943

அவர்களுடைய வங்கிக் கணக்கு விபரம்:
INDIAN BANK
A .RAVINDRAN
AC NO: 6240970957
OKKUR BRANCH








குப்பிளான் விக்னேஸ்வரா மகா வித்தியாலய பரிசளிப்பு விழா

யாழ். குப்பிளான் விக்னேஸ்வரா மகா வித்தியாலயத்தின் பரிசளிப்பு விழாவும், சரஸ்வதி சிலை திறப்பு விழாவும் நேற்று முன்தினம் நடைபெற்றது.






 பாடசாலையின் அதிபர் திரு. தம்பிராஜா தவராஜா அவர்களின் தலைமையில் நடைபெற்ற இந்நிகழ்வில் பிரதம விருந்தினராக புளொட் தலைவரும், தமிழ் தேசியக் கூட்டமைப்பின் வடக்கு மாகாண சபை உறுப்பினருமாகிய திரு. தர்மலிங்கம் சித்தார்த்தன் அவர்களும், சிறப்பு விருந்தினராக வைத்தியக்கலாநிதி கணேசலிங்கம் சுஜந்தன் அவர்களும், கௌரவ விருந்தினராக உடுவில் கோட்டக்கல்விப் பணிப்பாளர் திரு. தில்லைநாதன் தர்மலிங்கம் அவர்களும் கலந்து சிறப்பித்திருந்தனர். 

நிகழ்வில் ஆசியுரையினை சைவாகம ஜோதி சி.கிருஷ்ணசாமி குருக்கள் வழங்கினார். இதனைத் தொடர்ந்து சரஸ்வதி சிலை திறப்புவிழா இடம்பெற்றது. சிங்கப்பூரில் வசிக்கின்ற குப்பிளான் விக்னேஸ்வரா வித்தியாலய பழைய மாணவர் திரு. கிருஷ்ணர் அவர்கள் இப்பாடசாலையில் சரஸ்வதி சிலையினைக் கட்டுவதற்கு அனுசரணை வழங்கி உதவியிருந்தார். 

புளொட் தலைவரும், தமிழ் தேசியக் கூட்டமைப்பின் வடக்கு மாகாணசபை உறுப்பினருமாகிய திரு. தர்மலிங்கம் சித்தார்த்தன் அவர்கள் சரஸ்வதி சிலையினை திறந்து வைத்து உரையாற்றினார். தொடர்ந்து பிள்ளைகளுக்கான பல்வேறு கலை நிகழ்ச்சிகளும், பரிசளிப்பு விழாவும் இடம்பெற்றது. 

 அத்துடன் சிங்கப்பூரில் வசிக்கும் திரு. கிருஷ்ணன் அவர்களின் உதவியின்கீழ் வறுமைக் கோட்டுக்குக் கீழ் வாழும் அப்பகுதியைச் சேர்ந்த 200பேருக்கு உலருணவுப் பொதிகளும் வழங்கிவைக்கப்பட்டன. இந்நிகழ்வில் ஆசிரிய, ஆசிரியைகள், மாணவ, மாணவிகள், பெற்றோர்கள் என பெருந்திரளானோர் கலந்து கொண்டிருந்தனர்.

  (வதனன் யாழ் )

யாழ்ப்பாணம் - கிளிநொச்சி தண்ணீர் விநியோகம்

யாழ்ப்பாணம் - கிளிநொச்சி தண்ணீர் விநியோகம் மற்றும் சுகாதார திட்டம் தேசிய நீர் விநியோக மற்றும் வடிகாலமைப்புச்சபையினால் ஆரம்பிக்கப்படவுள்ளது.


ஆசிய அபிவிருத்தி வங்கி மற்றும் ஏஜென்ஸ் பிரான்கஸீ டி டிவலப்மன்ட் (Agence Francaise de Development (AFD)) நிறுவனம் மற்றும் இலங்கை அரசு ஆகியவற்றின் அனுசரனையுடன் இத்திட்டம் முன்னெடுக்கப்படவுள்ளது.

மீண்டும் ஆயுதம் ஏந்த மாட்டோம் ,சிறிதரன்

நாங்கள் இலங்கையை பிரிக்க கோரவில்லை, ஆயுதம் தூக்கி போராட சொல்லவில்லை ஆனால் தமிழர்களுக்கான அரசியல் தீர்வு தேவை என்றே கோருகின்றோம் என, பாராளுமன்ற உறுப்பினர் சிவஞானம் சிறிதரன் தெரிவித்துள்ளார்.

தமிழரசுக் கட்சியின் தேசிய மாநாட்டில் எடுக்கப்பட்ட தீர்மானத்தை கிராம மட்டத்தில் எடுத்து செல்லல் எனும் திட்டத்தின் கீழ் யாழ். மாவட்ட கிளையின் மாநாடு இன்று நல்லூர் இளங்கலைஞர் மண்டபத்தில் நடைபெற்றது.

இதில் கலந்து கொண்டு உரையாற்றும் போதே சிவஞானம் சிறிதரன் இவ்வாறு தெரிவித்தார்.

அரசாங்கம் தமிழர்களை பலவீனப்படுத்த முயல்கின்றது, அதற்கு தாடிவைச்ச சாத்தானும் அதனுடன் உள்ள குட்டி சாத்தான்களும் துணை போகின்றன என, அவர் இதன்போது சுட்டிக்காட்டினார்.

இன்றைய இந்த மாநாட்டில் பாராளுமன்ற உறுப்பினர்களான மாவை சேனாதிராஜா, ஈ.சரவணபவன், சி.சிறிதரன், மாகாண சபை மற்றும் பிரதேச சபை உறுப்பினர்கள், என பலரும் கலந்து கொண்டனர்.

இந்திய அரசும் விடுதலைப்புலிகள் மீதான தடையை நீக்க வேண்டும், வீரமணி

விடுதலைப் புலிகள் அமைப்பு மீதான தடையை நீக்கி ஐரோப்பிய ஒன்றிய நீதிமன்றம் தீர்ப்பளித்துள்ள நிலையில், இந்திய அரசும் விடுதலைப்புலிகள் அமைப்பு மீதான தடையை நீக்க வேண்டும் என்று திராவிடர் கழகத் தலைவர் கி. வீரமணி கூறியுள்ளார்.

இதுதொடர்பாக அவர் இன்று ஞாயிற்றுக்கிழமை வெளியிட்டுள்ள அறிக்கையில்,

விடுதலைப் புலிகள் அமைப்பை பயங்கரவாத அமைப்புப் பட்டியலிலிருந்து நீக்கி விடுதலை செய்ய வேண்டும் என்று ஐரோப்பிய நீதிமன்றம் தீர்ப்பு வழங்கியுள்ளது.

இதனைத் தொடர்ந்து இந்திய அரசும் முடிவை எடுக்க வேண்டும் என்ற வேண்டுகோள் தமிழ்நாட்டில் முன் வைக்கப்படுகிறது.

இல்லாத விடுதலைப்புலிகள் இயக்கத்திற்கு இங்குள்ள தடையை மீண்டும் இந்திய அரசு நீடிப்பது, உலகத் தமிழர்களின் வேதனைக்கும், கண்டனத்திற்கும் உரியதாக்கிவிடும்!

இலங்கை அரசே இங்கே விடுதலைப்புலிகளை முற்றாக அழித்துவிட்டோம் என்று கூறிவிட்ட நிலையில், நம் நாட்டில் மீண்டும் மீண்டும் விடுதலைப்புலிகள் இயக்கத்திற்குத் தடை நீடிக்கும் சடங்கு சம்பிரதாய சட்டத்தைத் தொடருவது எந்த நியாயத்தின் அடிப்படையிலோ என்று நமக்குப் புரியவில்லை.

எனவே, மத்திய அரசு இதுபற்றி மனிதநேய அடிப்படையில் பிரச்சினையை ஈர மனதுடன் அணுகவேண்டும். நிர்ப்பந்தப்படுத்தப்பட வேண்டிய இலங்கை அரசை நிர்ப்பந்தப்படுத்தி, ஈழத் தமிழர்களின் வாழ்வுரிமையை மீட்டெடுக்க உதவிடவேண்டும் முன்னுரிமை அதற்குத்தான் தரப்படவேண்டும்” என்று இன்றைக்கு நான்கு ஆண்டுகளுக்கு முன்பே தெளிவாக இந்திய அரசுக்கு வேண்டுகோள் விடுத்தோம்.

கழகத்தின் நியாயத்தை, சட்டப்படியான நிலையை இந்திய அரசு கவனம் செலுத்தத் தவறினாலும், ஐரோப்பிய யூனியன் நீதிமன்றம் உணர்ந்து தீர்ப்பளித்திருப்பது - வரவேற்கத்தக்கதாகும்.
 
Support : Creating Website | Johny Template | Mas Template
Copyright © 2011. tamiltvshows - All Rights Reserved
Template Created by Creating Website Published by Mas Template
Proudly powered by Free Blogger Template