New Videos from Youtube
Showing posts with label india. Show all posts
Showing posts with label india. Show all posts

ஒட்டன்சத்திரம் அருகே வெள்ளத்தில் சிக்கிக் கொண்ட 15 பேர் ஹெலிகாப்டர் மூலம் மீட்பு

திண்டுக்கல் மாவட்டம் ஒட்டன் சத்திரத்தை அடுத்த கொங்குபட்டி, காளிபட்டி என்ற கிராமத்தில், நல்லதங்காள் ஓடை, கன்னிநாயக்கன்படி ஓடை என்ற இரண்டு ஓடைகள் உள்ளன. சமீபத்தில் பெய்த மழை காரணமாக இரு ஓடைகளிலும் காட்டாற்று வெள்ளம் பெருக்கெடுத்தது. 

இதில் இரு ஓடைகளுக்கும் நடுவே தோட்ட வீடுகளில் வசித்து வந்த பழனிச்சாமி மற்றும் முருகாத்தாள் ஆகியோரது குடும்பத்தைச் சேர்ந்த 15 பேர் சிக்கிக் கொண்டனர். 

இவர்களை மீட்பதற்காக கோவை அடுத்த சூலூரில் இருந்து ஹெலிகாப்டர் வரவழைக்கப்பட்டது. மீட்புப்பணிகளை மாவட்ட கலெக்டர் பார்வையிட்டார். இந்நிலையில், 15 பேரும் ஹெலிகாப்டர் மூலம் பத்திரமாக மீட்கப்பட்டனர்.

திண்டுக்கல் மாவட்ட கலெக்டர் வெங்கடாச்சலம் கூறுகையில், 4 நாட்கள் தொடர்ந்து மழை பெய்ததால் (32 செ.மீ., அளவுக்கு) ஏற்பட்ட காட்டாற்று வெள்ளம் காரணமாக 15 பேர் சிக்கிக் கொண்டதாகவும்,

 உடனடியாக இந்த தகவல் முதல்வருக்கு தெரிவிக்கப்பட்டு, அவரது அறிவுறுத்தலின் பேரில், சூலூரிலிருந்து ஹெலிகாப்டர் வரவழைக்கப்பட்டு வெள்ளத்தில் சிக்கிக் கொண்டவர்கள் மீட்கப்பட்டதாகவும்,அனைவரும் விரைவாக மீட்கப்பட்டதாகவும் தெரிவித்தார்.

மகாராஷ்டிராவில் பா.ஜ.க ஆட்சியமைப்பதில் தொடர்ந்தும் சர்ச்சை

மகாராஷ்டிராவில் பாரதீய ஜனதாக் கட்சியின் கூட்டணிக் கட்சி குறித்த சர்ச்சை தொடர்ந்த வண்ணமுள்ளது.

மகாராஷ்டிர சட்டமன்றத் தேர்தலில் பாரதீய ஜனதாக் கட்சி 122 தொகுதிகளை வெற்றிகொண்டது

288 தொகுதிகளைக் கொண்ட மகாராஷ்டிராவில் பாஜக ஆட்சியமைக்க மேலும் 22 ஆசனங்கள் தேவைப்படுகின்றன.

தேசியவாதக் காங்கிரஸ் பாஜகவுக்கு வெளியிலிருந்து ஆதரவளிக்க தயார் என அறிவித்தபோதிலும், அது குறித்து இதுவரை எவ்விதமான பதிலையும் அக்கட்சி அறிவிக்கவில்லை

இந்நிலையில் தமது 25 வருட கூட்டணிக் கட்சியான சிவசேனாவுடன் ஆட்சியமைக்கவே, பாஜக ஆர்வமாகவுள்ளதாக இந்திய ஊடகங்கள் தெரிவிக்கின்றன

மகாராஷ்டிராவில் சிவசேனா 63 தொகுதிகளையும், தேசியவாத காங்கிரஸ் 41 தொகுதிகளையும் கைப்பற்றியுள்ளன.

இந்நிலையில் மத்திய உள்துறை அமைச்சர் ராஜ்நாத் சிங் தலைமையில் நடைபெறவிருந்த கூட்டணிக் கட்சி தொடர்பிலான கூட்டம் பிற்போடப்பட்டுள்ளது

மகாராஷ்டிராவில் பாஜக ஆட்சியமைக்கும் பட்சத்தில், அக்கட்சியின் மாநிலத் தலைவர் தேவேந்திர பட்னாவிஸுக்கே முதலமைச்சர் பதவி கிடைக்கும் என எதிர்ப்பார்க்கப்படுகிறது

கத்தி படத்தை திரையிடுவதற்கு எதிர்ப்பு தெரிவித்து திரையரங்கு உரிமையாளர்களிடம் மனு

கத்தி படத்தை திரையிடுவதற்கு எதிர்ப்பு தெரிவித்து உடுமலையில் திரையரங்கு உரிமையாளர்களிடம் தந்தை பெரியார் திராவிடர் கழகம், விடுதலைச் சிறுத்தைகள் கட்சி சார்பில் திங்கள்கிழமை மனு அளிக்கப்பட்டது.


தந்தை பெரியார் திராவிடர் கழக மாவட்டச் செயலாளர் சிவசங்கர், நகரத் தலைவர் யாழ் நடராசன், விடுதலைச் சிறுத்தைகள் கட்சி மடத்துக்குளம் ஒன்றியச் செயலாளர் ராஜசேகர் ஆகியோர் கட்சி நிர்வாகிகள் மற்றும் தொண்டர்கள் பலருடன் சென்று அளித்த மனு விவரம்:


நடிகர் விஜய் நடிப்பில் உருவான “கத்தி” என்ற திரைப்படம் தீபாவளியன்று வெளியாவதாகத் தெரிய வருகிறது. இத்திரைப்படத்தை லைக்கா மொபைல் நிறுவனம் தயாரித்துள்ளது. இந்நிறுவனத்தின் உரிமையாளர் சுபாஷ்கரனும், இலங்கை அதிபர் ராஜபட்சேவின் மகனும் இணைந்து தொழில் செய்து வருவதாக செய்திகள் வெளிவருகின்றன.


இனப்படுகொலை குற்றவாளி ராஜபட்சேவுடன் தொழில் ரீதியாக நட்புறவு கொண்டுள்ள சுபாஷ்கரன், தமிழ்த் திரையுலகில் முதலீடு செய்வது தமிழ் மக்களிடையே பெரும் அதிர்ச்சியை ஏற்படுத்தியுள்ளது. திரையுலகின் மூலமாகத் தமிழக அரசியலில் ஊடுருவ ராஜபட்சே முயற்சிப்பதாகவும், தமிழகத்தில் இளம் தலைமுறையினர் சிங்கள இனவெறிக்கு எதிராக அணி திரண்டு விடக் கூடாது என்பதற்காகவும் இதுபோன்ற முயற்சிகள் நடப்பதாக சந்தேகம் எழுந்துள்ளது.


எனவே, கத்தி திரைப்படத்தை திரையிடக் கூடாது. இது, ராஜபட்சேவுக்கு எதிரான கோரிக்கை என்பதை புரிந்து கொண்டு திரையரங்க உரிமையாளர்கள், படத்தை வெளியிடாமல் எங்களுக்கு ஆதரவு தெரிவித்து முழு ஒத்துழைப்பு அளிக்கவேண்டும் என்று அதில் கூறப்பட்டுள்ளது.

மழை காரணமாக தமிழக பள்ளிகளுக்கு விடுமுறை அறிவிப்பு

வடகிழக்கு பருவமழையால் தமிழகம் முழுவதும் தொடர் மழை பெய்துவருவதால், மாநிலத்தில் உள்ள பல மாவட்டங்களுக்கு இன்று பள்ளி, கல்லூரிகளுக்கு விடுமுறை அறிவிக்கப்பட்டுள்ளது. பல ஆண்டுகள் சரியாக மழை பெய்யாமல் பொய்த்து வந்தது. இந்த ஆண்டு உரிய நேரத்தில் துவங்கியிருக்கிறது. பல மாவட்டங்களில் மழை காரணமாக பயிர்கள் நாசமடைந்துள்ளது.

புதுச்சேரி, சென்னை, காஞ்சிபுரம், திருவள்ளூர், நாகை,திருச்சி, ஈரோடு, திருப்பூர், கோவை,கடலூர், தூத்துக்குடி மற்றும் தஞ்சாவூர், திருவாரூர். அரியலூர், கரூர் விழுப்புரம் ஆகிய பல மாவட்டங்களில் இன்று பள்ளி மற்றும் கல்லூரிகளுக்கு விடுமுறை அளிக்க உத்தரவிடப்பட்டுள்ளது.
சாதகமான வானிலை ஏற்பட்டுள்ளதால், தமிழகம், கேரளா, ஆந்திரா பகுதிகளில், 48 மணி நேரத்தில், வடகிழக்கு பருவமழை தீவிரம் அடைந்து உள்ளது என, சென்னை வானிலை ஆய்வு மையம் தெரிவித்துள்ளது.

இதற்கிடையில், வங்கக்கடலில் ஏற்பட்டுள்ள சாதகமான சூழல்கள், தமிழகம், கேரளா, ஆந்திரா, கர்நாடகா பகுதிகளில் வடகிழக்கு பருவமழை துவக்கத்திற்கான அறிகுறியாக கருதப்படுகிறது.தமிழகம் மற்றும் புதுச்சேரியில் அடுத்த இரு தினங்களுக்கு, சில பகுதிகளில் கனமழை பெய்யக் கூடும் என, வானிலை ஆய்வு மைய தகவல்கள் தெரிவிக்கின்றன. இதற்கிடையில், நேற்று காலை முதலே, சென்னை, காஞ்சிபுரம், திருவள்ளூர், மதுரை, நெல்லை உள்ளிட்ட தமிழகத்தின் பெரும்பாலான பகுதிகளில் விட்டுவிட்டு, கனமழை பெய்து வருகிறது.

கொட்டி தீர்த்த மழை:சென்னை எழும்பூர், திருவல்லிக்கேணி, பாரிமுனை, சேப்பாக்கம், ராயப்பேட்டை, தேனாம்பேட்டை, தியாகராய நகர், கோடம்பாக்கம், சைதாப்பேட்டை, மைலாப்பூர், அடையாறு, வடபழனி, கோயம்பேடு, வளசரவாக்கம், அண்ணா நகர், கீழ்ப்பாக்கம், புரசைவாக்கம், ராயபுரம், வண்ணாரப்பேட்டை, கொடுங்கையூர், பெரம்பூர் என சென்னை நகரின் அனைத்து பகுதிகளிலும் மழை கொட்டித் தீர்த்தது.

பெரும்பாலான சாலைகளில் மழை நீர் வெள்ளமாக ஓடியதன் காரணமாக வாகனங்கள் ஊர்ந்து சென்றதால் போக்குவரத்து கடுமையாக பாதிக்கப்பட்டது.நெல்லை பள்ளிகளுக்கு 2 நாட்கள் விடுமுறை; நெல்லை மாவட்டத்தில் தொடர் மழை காரணமாக அணைகள் நிரம்புகிறது. குற்றாலம் அருவியில் தண்ணீர் கொட்டுகிறது. நெல்லை யில் அதிக மழைப்பொழிவு இருப்பதால் இம்மாவட்டம் முழுவதும் பள்ளிகளுக்கு 2 நாட்கள் விடுமுறை அளிக்கப்பட்டுள்ளது. விழுப்புரம்- திருச்சி, அரியலூர் மாவட்ட பள்ளிகளுக்கும் விடுமுறை அறிவிக்கப்பட்டுள்ளது.

தண்ணீரில் மிதக்கும் சென்னை

சென்னையில் கடந்த வெள்ளிக்கிழமை முதல் 4 நாட்களாக மழை பெய்து வருகிறது. பல்வேறு இடங்களில் தண்ணீர் வடியாமல் தேங்கி நின்றதால் வாகன ஓட்டிகள், பொதுமக்கள் மிகவும் சிரமத்துக்குள்ளாகினர்.






தமிழக மீனவர்களைத் தாக்கிய இலங்கை ராணுவம்

கச்சத்தீவு அருகே மீன்பிடித்துக் கொண்டிருந்த தமிழக மீனவர்கள், இலங்கை கடற்படையினரால் தாக்கப்பட்டுள்ளதாக குற்றம் சுமத்தப்பட்டுள்ளது.

ராமேஸ்வரம் மற்றும் மண்டபம் பகுதியை சேர்ந்த மீனவர்கள், 1,200-க்கும் மேற்பட்ட விசைப்படகுகளில் கச்சத்தீவு அருகே மீன் பிடித்துக்கொண்டிருந்தனர்.

அப்போது, அங்கு வந்த இலங்கை கடற்படையினர் மீனவர்கள் மீது தாக்குதல் நடத்தியதோடு, மீன் பிடி சாதனங்களையும் சேதப்படுத்தினர். மேலும், படகுகளில் இருந்த பல லட்சம் மதிப்பிலான மீன்களையும் கொள்ளையடித்து சென்றுள்ளதாக மீனவர்கள் புகார் தெரிவித்துள்ளனர்.

இத்தாக்குதலில் சுமார் நூறுக்கும் மேற்பட்ட படகுகள் சேதமடைந்துள்ளதாகவும், படகு ஒன்றிற்கு முப்பதாயிரம் வரை இழப்பு ஏற்பட்டுள்ளதாகவும் பாதிக்கப்பட்ட மீனவர்கள் கூறியுள்ளனர்.

தமிழக மீனவர்கள் தாக்கப்படுவதை தடுத்து நிறுத்த அரசு உடனடியாக நடவடிக்கை எடுக்க வேண்டும் என மீனவர்கள் வலியுறுத்தி உள்ளனர்.

கேரளாவிலும், 'எபோலா' வைரஸ் பரவும் வாய்ப்பு

ஆப்ரிக்க நாடுகளில், இந்தாண்டு ஜனவரி முதல், 'எபோலா' வைரஸ் நோய் தாக்க துவங்கியது. இந்த நோய்க்கு இதுவரை, 4,000க்கும் அதிகமானோர் பலியாகியுள்ளனர். 

இந்நிலையில், கேரள மாநிலத்தை சேர்ந்தவர்கள் வெளிநாடுகளில் அதிகமாக வேலை பார்ப்பதால், கேரளாவிலும், 'எபோலா' வைரஸ் பரவும் வாய்ப்பு ஏற்பட்டு உள்ளது. இதையடுத்து, வெளிநாடுகளில் இருந்து வருவோரை தீவிர பரிசோதனைக்கு உட்படுத்தும் நடவடிக்கைகளில், கேரள மாநில சுகாதார துறை தீவிரமாக இறங்கியுள்ளது. 

இதற்காக, கேரளாவில் உள்ள அனைத்து விமான நிலையங்களிலும், சிறப்பு மருத்துவ மையங்கள் அமைக்கப்பட்டுள்ளன.

மோடியை அழிக்க குண்டுவெடிப்பு சம்பவங்கள் ,துலங்கும் உண்மைகள்

சென்னை சென்ட்ரல் ரயில் நிலையத்தில் நிகழ்ந்த, இரட்டை குண்டு வெடிப்பு வழக்கில் துப்பு துலங்கியுள்ளது. லஷ்கர் இ தொய்பா ஆதரவு பெற்ற, ஜமாத் உல் முஜாகிதீன், இந்தியன் முஜாகிதீன் பயங்கரவாத அமைப்புகள், கூட்டாக சேர்ந்து, இந்தச் சதி செயலை அரங்கேற்றி இருப்பதை, தேசிய புலனாய்வு நிறுவனத்தினர் உறுதி செய்துள்ளனர்.

மே, 1ம் தேதி, சென்னை சென்ட்ரல் ரயில் நிலையத்தின், ஒன்பதாவது நடைமேடையில், பெங்களூரு - கவுகாத்தி விரைவு ரயிலில், இரட்டை குண்டுவெடிப்பு நிகழ்ந்தது. அதில், ஆந்திர மாநிலம், ஐதராபாத்தை சேர்ந்த சுவாதி பலியானார்; 14 பேர் படுகாயம் அடைந்தனர். இது, நாடு முழுவதும் பெரும் அதிர்ச்சியை ஏற்படுத்தியது.இச்சம்பவம் குறித்து, சி.பி.சி.ஐ.டி., போலீசார் விசாரணை நடத்தினர். குண்டு வெடிப்பு நிகழ்ந்த, சென்ட்ரல் ரயில் நிலையத்தில் இருந்து, பெங்களூரு ரயில் நிலையம் வரை உள்ள கண்காணிப்பு கேமரா பதிவுகளை ஆய்வு செய்தனர். பல்வேறு கோணங்களில் ஆய்வு செய்த போதும், அவர்களால் துப்பு துலக்க முடியவில்லை.



என்.ஐ.ஏ., விசாரணை:




லோக்சபா தேர்தல் நேரத்தில், பா.ஜ.,வின் பிரதமர் வேட்பாளராக அறிவிக்கப்பட்டு, நரேந்திர மோடி சூறாவளி பிரசாரத்தில் ஈடுபட்டபோது, பீகார் மாநிலம், பாட்னாவில் நிகழ்ந்த தொடர் குண்டு வெடிப்பும், சென்னை, சென்ட்ரல் ரயில் நிலைய குண்டு வெடிப்பும் ஒரே மாதிரியாக இருந்ததால், இந்த வழக்கில் தேசிய புலனாய்வு நிறுவனத்தினர் (என்.ஐ.ஏ.,) தீவிரம் காட்ட துவங்கினர்.

இதற்கிடையில், அக்., 2ம் தேதி, மேற்கு வங்க மாநிலம், மால்டா மாவட்டத்திற்கு அருகே, ஒரு வீட்டில் நிகழ்ந்த குண்டுவெடிப்பில், ஷகில் அகமது, சோவன் மண்டல் என்ற இரு பயங்கரவாதிகள் இறந்தனர். படுகாயத்துடன் ஹசன் சாகிப் என்பவன் சிக்கினான்.மேலும், ஷகில் அகமதுவின் மனைவி ரஜிரா பீபி என்ற ரூமி, ஹசன் சாகிப்பின் மனைவி அமீனா பீபி ஆகியோரிடம், தேசிய புலனாய்வு நிறுவனத்தினர் நடத்திய விசாரணையில், திடுக்கிடும் பல உண்மைகள் வெளிவந்தன.



துப்பு துலங்கியது:



ரஜிரா பீபி உள்ளிட்டோர் அளித்த வாக்குமூலம்:எங்கள் கணவர்கள், லஷ்கர் இ தொய்பா பயங்கரவாத அமைப்பின் துணை அமைப்பான ஜமாத் உல் முஜாகிதீன் அமைப்பில், அதி தீவிரமாக செயல்பட்டனர். குண்டு தயாரிப்பது குறித்து எங்களுக்கும் கற்றுத் தந்தனர்.தென் மாநிலங்களில், பெங்களூருவை தலைமை இடமாக கொண்டு செயல்பட்டு வரும், இந்தியன் முஜாகிதீன் அமைப்புடன், ஜமாத் உல் முஜாகிதீன் அமைப்பு நெருங்கிய தொடர்பு கொண்டு இருந்தது. நரேந்திர மோடி, எங்கெல்லாம் பிரசாரத்திற்கு செல்கிறாரோ, அங்கெல்லாம் குண்டுகள் வைக்க வேண்டும் என்பது, இந்தியன் முஜாகிதீன் அமைப்பின் திட்டம். அதற்காக, எங்களிடம் இருந்து வெடிகுண்டுகளை வாங்கி செல்வர்.சென்னை, சென்ட்ரல் ரயில் நிலையத்தில் குண்டு வைப்பதற்கு முன், எங்கள் கணவர்கள், கடந்த, ஏப்ரல் மாதத்தில், பல முறை, சென்னைக்கு நேரில் சென்று முன்னோட்டம் பார்த்து வந்தனர். இவ்வாறு, அவர்கள் தெரிவித்தனர்.

அவர்களிடம் விசாரணை நடத்திய அதிகாரிகள் கூறியதாவது: ஆந்திராவிற்கு பிரசாரத்திற்காக வந்த, நரேந்திர மோடியை குறிவைத்தே, வெடிகுண்டு வைக்கப்பட்டுள்ளது. காலதாமதத்தால், சென்டரல் ரயில் நிலையத்தில் குண்டு வெடித்து விட்டது.

மேலும், மேற்கு வங்க மாநிலம், பரத்வானில் குண்டுவெடிப்பு நிகழ்ந்த இடத்தில், சேகரிக்கப்பட்ட, வெடிமருந்து தடயங்களும், சென்னை, சென்டரலில் சேகரிக்கப்பட்ட தடயங்களும் சந்தேகத்திற்கு இடமில்லாத வகையில், ஒத்துப் போகின்றன.அதனால், லஷ்கர் இ தொய்பா ஆதரவு பெற்ற, ஜமாத் உல் முஜாகிதீன், இந்தியன் முஜாகிதீன் அமைப்பை சேர்ந்தவர்கள் தான், சென்ட்ரல் ரயில் நிலையத்தில் குண்டு வெடிப்பை நிகழ்த்தியுள்ளனர் என்ற, முடிவுக்கு வந்துள்ளோம். 

மேலும், சென்னை சென்ட்ரலில் குண்டுவெடிப்பு நிகழ்த்துவதற்கு முன், சென்னையில் தங்கி உள்ள சிலருடன், பயங்கரவாதிகள் பலமுறை மொபைல் போனில் பேசியுள்ளனர். அதற்கான ஆதாரங்களை திரட்டியுள்ளோம்.இந்த பயங்கரவாத அமைப்பை சேர்ந்தவர்கள், அசாம் உள்ளிட்ட மாநிலங்களில் பதுங்கி இருப்பதும் தெரிய வந்துள்ளது. அந்த பயங்கரவாதிகள் விரைவில் கைது செய்யப்பட்டு, சட்டத்தின் முன் நிறுத்தப்படுவர்.இவ்வாறு, அவர்கள் தெரிவித்தனர்.

ஜெயலலிதாவுக்கு கடிதம் எழுதிய ரஜனி

சொத்துக் குவிப்பு வழக்கில் பிணையில் விடுவிக்கப்பட்டுள்ள தமிழக முன்னாள் முதல்வர் ஜெயலலிதாவுக்கு நடிகர் ரஜினிகாந்த் கடிதம் எழுதியுள்ளார்.

18 வருடங்களாக நடைபெற்று வந்த சொத்துக் குவிப்பு வழக்கில் ஜெயலலிதாவுக்கு 4 ஆண்டுகள் சிறைத் தண்டனையும் 100 கோடி இந்திய ரூபாய் அபராதமும் விதித்து கடந்த மாதம் பெங்களூர் சிறப்பு நீதிமன்றம் உத்தரவிட்டது.

அதனைத் தொடர்ந்து தனது முதல்வர் பதவியை இழந்த ஜெயலலிதா பெங்களூர் பரப்பன அக்ரஹாரா சிறையில் அடைக்கப்பட்டார். இந்நிலையில், தற்போது பிணையில் விடுவிக்கப்பட்டுள்ள ஜெயலலிதாவுக்கு நடிகர் ரஜினிகாந்த் கடிதம் ஒன்றை அனுப்பியுள்ளார்.

அந்த கடிதத்தில், 'நீங்கள் போயஸ் கார்டனுக்குத் திரும்பியதில் நான் மிகுந்த மகிழ்ச்சி அடைகிறேன். உங்களது நல்ல நேரத்துக்காக நான் பிரார்த்தனை செய்கிறேன். உங்களது உடல் ஆரோக்கியத்துக்கும் மன அமைதிக்கும் எப்போதும் வாழ்த்துகிறேன். இனிய தீபாவளி நல்வாழ்த்துகள்' என ரஜினி தனது கடிதத்தில் தெரிவித்துள்ளார்.

ஜெயலலிதா கைதால் தமிழகத்தில் ஏற்பட்ட அரசியல் சூழலை தங்களுக்கு சாதகமாக்கி, ரஜினியை பா.ஜ.க.வுக்குள் இழுக்க முயற்சிகள் நடந்து வருவதை அண்மைய சந்திப்புகள் உறுதி செய்து வருகின்றன.

இந்நிலையில், அ.தி.மு.க பொதுச் செயலாளரும், தமிழக முன்னாள் முதல்வருமான ஜெயலலிதாவிற்கு ரஜினி கடிதம் எழுதி இருப்பது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

ஜெயலலிதாவை விடுதலை செய்யக் கோரி அ.தி.மு.க.வினர் நடத்திய உண்ணாவிரதப் போராட்டத்தில் கூட ரஜினி கலந்துகொள்ளாதது குறிப்பிடத்தக்கது.

இதனிடையே, ஜெயலலிதாவுக்கு மத்திய மகளிர் மற்றும் குழந்தைகள் மேம்பாட்டுத்துறை அமைச்சர் மேனகா காந்தி கடிதம் அனுப்பியுள்ளார். அதில், அண்மைய காலமாக நடந்தவை அனைத்தும் வருத்தத்துக்கு உரியது என்றும், ஜெயலலிதாவுக்கு தனது ஆதரவு எப்போதும் உண்டு என்றும் அவர் குறிப்பிட்டுள்ளார்.

மேலும், எல்லா பிரச்சினைகளும் இடர்பாடுகளும் விரைவில் முடிவுக்கு வந்து, மீண்டும் முறைப்படி நிர்வாகத்தில் ஈடுபடுவீர்கள் என அக்கடிதத்தில் மேனகா காந்தி தெரிவித்துள்ளார்

தமிழக மக்களின் பேராதரவு இருக்கும் வரையில் எதைக் கண்டும் அஞ்சப் போவதில்லை,ஜெயலலிதா

அ.தி.மு.க. பொதுச் செயலாளர் ஜெயலலிதா வெளியிட்டுள்ள அறிக்கையில் கூறி இருப்பதாவது,

எனது பொது வாழ்வு நெருப்பாற்றில் நீந்துவதற்கு ஒப்பானதாக இருந்து வருகிறது. பொது நலனுக்காக நம்மை அர்ப்பணித்து வாழ்வது, எத்தகைய இடர்பாடுகளை உடையதாக இருக்கும் என்பதை அரசியல் வாழ்வில் நுழைந்த நாளில் இருந்து உங்கள் அன்புச் சகோதரியாகிய நான் நன்கு உணர்ந்திருக்கிறேன்.

“அ.தி.முக. என்னும் பேரியக்கத்தைக் காப்பாற்ற வேண்டும் என்பதற்காக உன்னையே நீ அர்ப்பணித்து பணியாற்ற வேண்டும்” என்று புரட்சித் தலைவர் டாக்டர் எம்.ஜி.ஆர். என்னிடம் பெற்றுக் கொண்ட சத்தியத்தை இதயத்தில் ஏற்று நாளும் வாழ்ந்து கொண்டிருக்கிறேன். தொடர்ந்து அந்தப் பாதையிலேயே என்னுடைய பயணம் அமையும்.

அ.தி.மு.க.வின் வளர்ச்சி, என் உயிரினும் மேலான எனது தலைமைக் கழக உடன்பிறப்புகளின் நலன், எல்லாவற்றிற்கும் மேலாக தமிழக மக்களின் நல்வாழ்வு, முன்னேற்றம், உயர்வு, இவை தான் என் இதயத்தில் என்றைக்கும் நான் பதித்து வைத்திருக்கும் இலக்குகள்.

இந்தப் பாதையில் என்னுடைய பயணம் நடைபெறும் போது ஏற்படுகின்ற இன்னல்களைப் பற்றியோ, துயரங்களைப் பற்றியோ, சோதனைகளைப் பற்றியோ, வேதனைகளைப் பற்றியோ நான் சிறிதும் கவலைப்படுவதில்லை.

இந்தத் துயரங்கள் ஏற்படுத்துகின்ற வலி எவ்வளவு அதிகமாக இருந்தாலும் அதைத் தாங்கிக் கொள்கின்ற மனப் பக்குவத்தை இறைவன் எனக்கு அளித்திருக்கிறான்.

அ.தி.மு.க உடன்பிறப்புகளின் எதிர்பார்ப்புகளுக்கு ஏற்பவும், தமிழக மக்களின் முன்னேற்றத்திற்காகவும் என்றைக்கும் நான் உழைப்பேன், எந்தத் தியாகத்தையும் மேற்கொள்வேன் என்ற உறுதியை நான் உங்களுக்கு அளிக்க விரும்புகிறேன்.

எனக்கு நினைவு தெரிந்த நாளில் இருந்து என் வாழ்வில் எத்தனையோ சோதனைகளை நான் சந்தித்து வந்திருக்கிறேன். அவற்றில் இருந்து வெற்றிகரமாக மீண்டு வந்திருக்கிறேன்.

உங்கள் அன்பும், தமிழக மக்களின் பேராதரவும் எனக்கு இருக்கும் வரையில் எதைக் கண்டும் நான் அஞ்சப் போவதில்லை, மனம் தளரப்போவதில்லை.

தற்போது எனக்கு ஏற்பட்டிருக்கும் சூழ்நிலையைப் பார்த்து உள்ளம் வெதும்பி, நான் சந்திக்கும் துயரங்களைக் கண்டு தாங்கிக் கொள்ள முடியாமல், என் மீது மிகுந்த பேரன்பு கொண்டுள்ள தாய்மார்கள், பொதுமக்கள், கழக உடன்பிறப்புகள், குறிப்பாக, என் இதயத்தின் ஆழத்தில் வேர் விட்டிருக்கும் மாணவச் செல்வங்கள் என மொத்தம் 193 பேர் மரணம் அடைந்துவிட்டனர் என்ற துயரச் செய்தி கேட்டும், மேலும் தங்கள் இன்னுயிரை மாய்த்துக் கொள்ளும் முயற்சியில் ஈடுபட்ட 3 பேர் மருத்துவமனையில் சிகிச்சை பெற்று வருகின்றனர் என்ற செய்தி கேட்டும் தாங்கொணா வேதனை அடைகிறேன். இந்தச் செய்தி எனக்கு மிகுந்த மன வலியைத் தருகிறது.

எனக்கு ஏற்பட்ட துயரத்தைத் தாங்கிக் கொள்ள முடியாமல் மரணமடைந்த 193 பேர்களின் குடும்பத்தினருக்கு எனது ஆழ்ந்த இரங்கலையும், அனுதாபத்தையும் தெரிவித்துக் கொள்வதுடன், அவர்களது ஆன்மா இறைவன் திருவடி நிழலில் அமைதி பெற எல்லாம் வல்ல இறைவனைப் பிரார்த்திப்பதோடு, மரணமடைந்தோர்களது குடும்பத்தினருக்கு அ.தி.மு.க.வின் சார்பில் தலா மூன்று இலட்சம் ரூபாய் குடும்ப நல நிதியுதவி வழங்கப்படும் என்பதையும், மருத்துவ மனையில் அனுமதிக்கப்பட்டுள்ள 3 பேர்களின் மருத்துவ சிகிச்சைக்கு தலா ஐம்பதாயிரம் ரூபாய் வழங்கப்படும் என்பதையும் தெரிவித்துக் கொள்கிறேன்.

மேலும், மருத்துவமனையில் சிகிச்சை பெற்று வருபவர்கள் விரைவில் பூரண நலம் பெற்று வீடு திரும்ப எல்லாம் வல்ல இறைவனைப் பிரார்த்திக்கிறேன்.

எனக்கு ஏற்பட்ட சூழ் நிலையை தாங்கிக் கொள்ள முடியாமல் பல்வேறு காரணங்களால் மரணமடைந்தவர்கள் மற்றும் மருத்துவமனையில் சிகிச்சை பெற்று வருபவர்களின் பட்டியல் இத்துடன் வெளியிடப்படுகிறது. தன்னையே மாய்த்துக் கொள்ளும் இத்தகைய செயல்களில் இனி யாரும் ஈடுபடக் கூடாது என்று அன்புடன் கேட்டுக் கொள்கிறேன்.

என் மீது பேரன்பு கொண்டுள்ள பல இலட்சக் கணக்கான தாய்மார்களும், பொது மக்களும், ஆதரவாளர்களும், தோழமைக் கட்சியினரும், மாணவ, மாணவியர்களும், என் உயிரினும் மேலான எனதருமைக் கழக உடன் பிறப்புகளும், நான் சோதனையில் இருந்து மீண்டு வர வேண்டும் என்பதற்காக திருக்கோயில்களிலும், தேவாலயங்களிலும், மசூதிகளிலும், பிற இடங்களிலும் சிறப்புப் பிரார்த்தனைகள் செய்துள்ள விவரங்களையும், நேர்த்திக் கடன் செலுத்தியுள்ள விவரங்களையும் அறிந்து நெகிழ்ச்சி அடைகிறேன்.

என் மீது பாசமும், பற்றும் கொண்டுள்ள தமிழக மக்கள் அனைவருக்கும் எனது நெஞ்சார்ந்த நன்றியை அன்புடன் தெரிவித்துக் கொள்கிறேன். இவ்வாறு அதில் கூறியுள்ளார்.

மோடியின் அலையில் எதிர்க்கட்சிகள் காணாமல் போய்விட்டன: அமித்ஷா

மகாராஷ்டிரா, அரியானா மாநில சட்டசபை தேர்தலில் பாஜக வெற்றி பெற்றது. இதுதொடர்பாக டெல்லியில் பாஜக தேசிய தலைவர் அமித் ஷா செய்தியாளர்களை சந்தித்தார்.


அப்போது அவர் கூறியதாவது,


மோடியின் அலையில் எதிர்க்கட்சிகள் காணாமல் போய்விட்டன. மகாராஷ்டிரா, அரியானா தேர்தல் முடிவுகள் மத்தியில் 5 மாத பாஜகவுக்கு கிடைத்த வெற்றி. இரு மாநிலங்களிலும் காங்கிரஸ் கட்சி 3வது இடத்துககு தள்ளப்பட்டுள்ளது என்றார்.

இருமாநில சட்டமன்றத் தேர்தலில் பதிவான வாக்குகள் எண்ணிக்கை

மகாராஷ்டிரா, அரியானா ஆகிய இரு மாநிலங்களிலும் கடந்த அக்டோபர் 15ஆம் தேதி சட்டமன்றத் தேர்தல் நடைபெற்றது. அதில் பதிவான வாக்குகள் ஞாயிற்றுக்கிழமை எண்ணப்படுகின்றன. இரு மாநிலங்களிலும் வாக்கு எணிணிக்கை காலை 8 மணிக்கு தொடங்குகிறது.


மகாராஷ்டிரா மாநிலத்தில் 288 தொகுதிகளும், அரியானாவில் 90 தொகுதிகளும் உள்ளன. அரியானாவில் 76.54 சதவீத வாக்குகளும், மகாராஷ்டிரா மாநிலத்தில் 63.13 சதவீத வாக்குகளும் பதிவாகின.


மகாராஷ்டிராவில் காங்கிரஸ், பாஜக, சிவசேனா, தேசியவாத காங்கிரஸ் இடையே போட்டி நிலவுகிறது. அரியானாவில் காங்கிரஸ், இந்திய தேசிய லோக் தளம், பாஜக இடையே போட்டி நிலவுகிறது.


அரியானா மாநில சட்டசபை தேர்தல்: பாஜக முன்னிலை

அரியானா மாநிலத்தில் கடந்த அக்டோபர் 15ஆம் தேதி சட்டமன்றத் தேர்தல் நடைபெற்றது. 90 தொகுதிகள் உள்ளன. 76.54 சதவீத வாக்குகள் பதிவாகின. அதில் பதிவான வாக்குகள் ஞாயிற்றுக்கிழமை எண்ணப்படுகின்றன. வாக்கு எணிணிக்கை காலை 8 மணிக்கு தொடங்கியது.


அரியானாவில் காங்கிரஸ், இந்திய தேசிய லோக் தளம், பாஜக இடையே போட்டி நிலவுகிறது.


காலை 10.52 மணி நிலவரப்படி பாஜக 44, காங்கிரஸ் 12, இந்திய தேசிய லோக் தளம் 20, சுயேச்சைகள் 4 தொகுதிகளில் முன்னிலையில் உள்ளன.

இருபத்தொரு நாட்கள் சிறையில் இருந்த முன்னால் தமிழக முதல்வர் ஜெயலலிதா

கிட்டத்தட்ட இருபத்தொரு நாட்கள் சிறையில் இருந்த முன்னால் தமிழக முதல்வர் ஜெயலலிதா இன்று வெளிவந்தார்.

சொத்துக் குவிப்பு வழக்கில், குற்றவாளி என்று நிரூபிக்கப்பட்டு, 100 கோடி ரூபாய் அபராதத்துடன், 4 ஆண்டு சிறை தண்டனையும் பெற்று பெங்களூர் சிறையில் அடைக்கப்பட்டுள்ள தமிழக முன்னால் முதல்வர் ஜெயலலிதாவுக்கு இடைக்கால ஜாமீன் வழங்கி உச்சநீதிமன்றம் உத்தரவிட்டுள்ளது.

இந்த வழக்கின் மேல் முறையீட்டு மனுவின் அடுத்தகட்ட விசாரணை டிசம்பர் மாதம் 18ஆம் தேதி அன்று நடைபெறும் என்றும், அதுவரை அவருக்கு இடைக்கால ஜாமீன் வழங்கப்படுகிறது என்று உச்ச நீதிமன்றம் தெரிவித்துள்ளது. இந்த இடைக்காலத்தில் வீட்டுச்சிறையில் இருப்பார் எனவும், மருத்துவர்கள் மற்றும் சில முக்கிய புள்ளிகள் மட்டும் பார்க்கலாம் எனவும் தெரிகிறது.

பெங்களூரு சிறப்பு நீதிமன்றம் பிறப்பித்த தீர்ப்பை நிறுத்தி வைக்கக் கோரியும், ஜாமீன் வழங்கக் கோரியும் ஜெயலலிதா சார்பில் தாக்கல் செய்யப்பட்ட மனு, மீதான விசாரணை நேற்று உச்சநீதிமன்றத்தில் உச்சநீதிமன்ற தலைமை நீதிபதி தத்து மற்றும் நீதிபதிகள் மதன் பி.லோக்கூர், ஏ.கே. சிக்ரி ஆகியோர் அடங்கிய அமர்வு முன்பு வந்தபோது அவருக்கு ஜாமீன் வழங்கப்பட்டுள்ளது.

ஜெயலலிதாவுடன் இந்த வழக்கில் குற்றவாளிகள் என்று தண்டிக்கப்பட்டு சிறையில் இருக்கும் ஜெயலலிதாவின் வீட்டில் வசிக்கும் அவரது தோழி சசிகலா, சசிகலாவின் உறவினர்கள் இளவரசி மற்றும் சுதாகரன் ஆகியோருக்கும் உச்சநீதிமன்றம் ஜாமீன் வழங்கி உத்தரவு பிறப்பித்திருக்கிறது. ஜெயலலிதாவின் வயது மற்றும் உடல்நலம் ஆகிய காரணங்களின் அடிப்படையில் அவருக்கு ஜாமீன் வழங்கப்பட்டுள்ளது.

இன்று பெங்களூரு சிறையில் இருந்து தமிழகம் வருகிறார். சிறையில் இருந்து வெளிவந்த ஜெயலலிதாவை, தமிழகத்தின் தற்போதைய முதல்வர் ஓ.பன்னீர் செல்வம் நேரில் சென்று வரவேற்றார்.

தமிழகத்தின் அதிமுக அலுவலகங்களிலும், பொது இடங்களிலும் ஆதிமுகவினர் கொண்டாட்டங்களில் ஈடுப்பட்டு வருகின்றனர்.

ஏழை மக்கள் வாழ்க்கையில் விளையாடினால் கையை வெட்டுவேன்: பீகார் முதல்வர்

ஏழைகள் வாழ்க்கையில் விளையாடுபவர்கள் யாராக இருந்தாலும் அவர்களை கையை துண்டிப்பேன் என பீகார் முதல்வர் ஆவேசமாக பேசினார்.

பீகாரில் முதல்வர் ஜிதின்ராம் மஞ்சி தலைமையில் ஐக்கிய ஜனதா தளம் ஆட்சி நடக்கிறது. கடந்த சில வாரங்களுக்கு முன் பாட்னாவில் நடந்த தசரா பண்டிகையின் போது ஏற்பட்ட கூட்ட நெரிசலில் 30-க்கும் மேற்பட்டோர் இறந்தார். காயமடைந்தவர்கள் பாட்னா அரசு மருத்துவக்கல்லூரி மருத்துவமனையில் அனுமதிக்கப்பட்டனர். அங்கு டாக்டர்கள், மருத்துவமனை ஊழியர்கள் போதிய சிகிச்சை அளிக்கவில்லை என புகார் கூறினர்.

இந்நிலையில மோத்திஹாரி மாவட்டத்தில் நடந்த அரசு விழாவில் பங்கேற்ற முதல்வர் ஜிதின்ராம் மஞ்சி பேசுகையில், ஏழை எளிய மக்கள் வாழ்க்கையில் விளையாடுபவர்கள் யாராக இருந்தாலும் அவர்கள் கையை துண்டித்துவிடுவேன் என ஆவேசமாக பேசினார். இவரின் ஆவேச பேச்சு முதலில் குழப்பத்தை ஏற்படுத்தியது.பின்னர் தான் அவர் அரசு டாக்டர்களை எச்சரிக்கும் விதமாக பேசியது புரிந்தது.

மேட்டூர் அணையில் நீர்திறப்பு குறைப்பு

மேட்டூர் அணையில் இருந்து பாசனத்திற்காக திறக்கப்படும் தண்ணீரின் அளவு குறைக்கப்பட்டுள்ளது.


திறக்கப்படும் நீரின் அளவு 15 ஆயிரம் கன அடியில் இருந்து ஆயிரம் கனஅடியாக குறைக்கப்பட்டுள்ளது. டெல்டா மாவட்டங்களில் கனமழை பெய்து வருவதால் திறக்கப்படும் நீரின் அளவு குறைக்கப்பட்டுள்ளது. மேட்டூர் அணையக்கு நீர்வரத்து 7,443 கன அடியில் இருந்து 6,860 கன அடியாக குறைந்தது.


மேட்டூர் அணையின் நீர்மட்டம் 87.41 அடியாக உள்ளது. நீர் இருப்பு 49.74 டி.எம்.சி.யாக உள்ளது. பாசனத்திற்காக கால்வாயில் இருந்து தனியாக விநாடிக்கு 500 கனஅடி தண்ணீர் திறக்கப்படுகிறது.

இந்தியாவில் புலிகளுக்குத்தடை அகற்றுவது குறித்து ஆலோசனை ?

இந்தியாவில் விடுதலைப் புலிகள் அமைப்பின் மீதான தடையை நீக்குவது குறித்து மத்திய அரசு இதுவரை ஆலோசிக்கவில்லை என்று மத்திய அமைச்சர் வெங்கையா நாயுடு கூறியுள்ளார். 

சென்னை விமான நிலையத்தில் செய்தியாளர்களுக்கு பேட்டியளிக்கையிலேயே அவர் இவ்வாறு குறிப்பிட்டுள்ளார். 

இங்கு அவர் மேலும் கூறியதாவது, 

செத்துக் குவிப்பு வழக்கில் அதிமுக பொதுச்செயலாளர் ஜெயலலிதாவுக்கு நீதிமன்றம் வழங்கிய தீர்ப்பை அனைவரும் மதிக்க வேண்டும். 

ஐரோப்பிய ஒன்றிய நீதிமன்றம் விடுதலைப் புலிகள் அமைப்பின் மீதான தடையை நீக்கிய போதிலும், அந்த அமைப்பின் மீதான தடையை இந்தியாவில் நீக்குவது குறித்து மத்திய அரசு இதுவரை ஆலோசிக்கவில்லை என்று குறிப்பிட்டார்.

ஜெ., வை வரவேற்க மனித சங்கிலி தயார் நிலையில்

பெங்களூரு: பெங்களூரு பரப்பன அக்ரகார சிறையில் உள்ள அ.தி.மு.க., பொதுச் செயலாளர் ஜெயலலிதாவை ஜாமினில் விடுவிக்க சுப்ரீம் .கோர்ட் நேற்று உத்தரவிட்டுள்ளதை தொடர்ந்து, இன்று அவர் சிறையிலிருந்து விடுவிக்கப்படுகிறார்.
பகல் 11 மணி அளவில் பெங்களூரு சிறப்பு கோர்ட் கூடியதும், ஜெயலலிதாவின் ஜாமின் தொடர்பாக சுப்ரீம் கோர்ட் பிறப்பித்த உத்தரவு, நீதிபதி குன்காவிடம் தாக்கல் செய்யப்படும். அதை பரிசீலிக்கும் நீதிபதி, ஜாமினில் ஜெயலலிதா உட்பட 4 பேரையும் விடுவிப்பதற்கான நடைமுறைகளுக்கு உத்தரவிடுவார். அவரடைய உத்தரவு சிறை அதிகாரிகளுக்குத் தெரிவிக்கப்படும். இதைத் தொடர்ந்து இன்று பிற்பகலில் ஜெயலலிதா விடுவிக்கப்படுவார் என்று எதிர்பார்க்கப்படுகிறது.

இதற்கிடையில் ஜெயலலிதா வழக்கமாக பயன்படுத்தும் கார், நாற்காலி போன்றவை இன்று சிறை வளாகத்துக்குள் கொண்டு செல்லப்பட்டன. ஜெயலலிதாவுக்காக .ஹெலிகாப்டர் மற்றும் தனி விமானம் தயார் நிலையில் உள்ளது. ஜெயலலிதாவை வரவேற்கும் வகையில், பரப்பன அக்ரகார் சிறை வளாகத்துக்கு வௌியே அ.தி.மு.க.,வினர் சார்பில் வைக்கப்பட இருந்த 500க்கும் மேற்பட்ட பிளக்ஸ் போர்டுகளை, உரிய அனுமதி இல்லை என கூறி போலீசார் கைப்பற்றினர். ஓசூர் சாலையிலிருந்து சிறை வரையான 2 கிலோமீட்டர் தூரத்துக்கும், 10 அடிக்கு ஒரு போலீசார் வீதம் நிறுத்தப்பட்டுள்ளனர். சாலையில் தடுப்புகளும் அமைக்கப்பட்டுள்ளன.முதல்வர் பன்னீர் செல்வம், இன்று காலை பெங்களூருவுக்கு விமானம் மூலம் சென்றிருப்பதாக சென்னை தகவல் கூறுகிறது.ஜெ.,வை வரவேற்க மனித சங்கலி ; பெங்களூரு சிறையில் இருந்து இன்று விடுதலையாகி சென்னை வரும் ஜெ.,வுக்கு சிறப்பான வரவேற்பு அளிக்க ஏற்பாடு செய்யப்பட்டுள்ளது. விமான நிலையத்தில் இருந்து போயஸ்கார்டன் வரை அ.தி.மு.க.,வினர் மனிதசங்கிலியாக நின்று வரவேற்கவுள்ளனர். இந்நிகழ்ச்சியில் சென்னையில் உள்ள கட்சி நிர்வாகிகள் மற்றும் தொண்டர்கள் உள்பட பலர் பங்கேற்கவுள்ளனர். பட்டாசு வெடித்து, மேளம் முழங்கிடவும் தொண்டர்கள் தடல், புடல் ஏற்பாடுகளை செய்து வருகின்றனர்.

14-வயது சிறுமி பாலியல் பலாத்காரம்; இளைஞருக்கு 24 ஆண்டு சிறை

திருப்பூர் மாவட்டம், தாராபுரம் அருகே, குண்டடத்தை அடுத்த குங்குமம்பாளையம், அரிஜனக் காலனியைச் சேர்ந்தவர் செல்வகுமார் (வயது-24). சரக்குவாகன ஓட்டுநரான இவர், கடந்த பிப்ரவரி 26-ஆம் தேதி பக்கத்து வீட்டிற்குள் புகுந்து, அங்கு தனியாக இருந்த 14-வயது சிறுமியை பாலியல் பலாத்காரம் செய்துள்ளார்.

இது தொடர்பாக, தாராபுரம் மகளிர் காவல் துறையினர் வழக்குப் பதிவு செய்து செல்வகுமாரை கைது செய்தனர். இதுகுறித்த வழக்கு விசாரணை திருப்பூர் மாவட்ட மகளிர் நீதிமன்றத்தில் நடைபெற்று வந்தது. அரசுத் தரப்பில் வழக்குரைஞர் வி.பரிமளா ஆஜராகி வாதாடினார்.

விசாரணை முடிவில், வெள்ளிக்கிழமையன்று வழக்கின் தீர்ப்பு வெளியிடப்பட்டது. அதில், பக்கத்து வீட்டிற்குள் அனுமதியின்றி, அத்துமீறி நுழைந்ததற்காக 7 ஆண்டுகள் சிறை தனத்னையும், ரூ. 5,000 அபராதமும், சிறுமியை பாலியல் பலாத்காரம் செய்த குற்றத்திற்கு 7 ஆண்டுகள் சிறை மற்றும் ரூ. 10,000 அபராதம், குழந்தைகளை பாலியல் குற்றங்களில் இருந்து பாதுகாக்கும் சிறப்பு சட்டத்தின் கீழ் குற்றம் புரிந்த செல்வகுமாருக்கு 10 ஆண்டுகள் சிறை, ரூ. 10,000 அபராதம் என மொத்தம் 24 ஆண்டுகள் சிறை தண்டனையும், ரூ. 25,000 அபராதமும் விதித்து நீதிபதி வசந்த லீலா தீர்ப்பளித்தார்.

ஆனால், குற்றவாளி இந்த தண்டனையை ஏககாலத்தில் அனுபவிக்க வேண்டும் என கூறியதால், அவர் அதிகபட்ச்சமாக 10 –ஆண்டுகள் சிறையில் இருக்கவேண்டும் என தெரிகிறது.

தோஷம் கழிப்பதாகக் கூறி நகை பறிக்க முயன்ற போலி சாமியார் கைது

கரூர் வெங்கமேடு திருப்பூர் குமரன் தெருவைச் சேர்ந்தவர் ஆறுமுகம் (வயது-34). டெக்ஸ்டைல் தொழிலாளியான இவரது மனைவி பெயர் பிரியா (வயது-28). இவர் புதன்கிழமை மாலை தனது வீட்டிலிருந்த போது அங்கு வந்த ஒரு சாமியார் அம்மா தாயீ... இந்த வீட்டிலே ஒரு கெட்டகாரியம் நடக்கப் போகுது, அத உன்னாலே தடுக்க முடியும்... என்று சொல்லியுள்ளார்.

இதை கேட்டு வெளியே ஓடிவந்த பிரியாவிடம், உன்னுடைய கணவருக்கு தோஷம் உள்ளது, அதை உடனடியாக போக்கவேண்டும் இல்லையானால் அவருடைய உயிருக்கு ஆபத்து என சாமியார் கூறியுள்ளார்.

இதைக்கேட்ட பிரியாவும், அவரது கனவர் ஆறுமுகம் அதிர்ச்சியடைந்தார். தோஷம் கழிக்க என்ன செய்ய வேண்டும் என சாமியாரிடம் கேட்டதற்கு, தாலி நிலைக்க செய்யப்படும் பூஜை என்பதால் தாலியை கழற்றி புளிக்குள் வைத்து சுவாமியை நினைத்து வழிபாடு செய்ய வேண்டும் எனக்கூறியுள்ளார்.

சாமியாரை வீட்டுக்குள் கூட்டிக்கொண்டு வந்த பிரியாவும், ஆறுமுகமும் சாமியாரை உட்கார சாமி படத்தின் முன்பாக உட்கார வைத்து பரிகாரம் செய்யச் சொல்லியுள்ளனர்.

பிரியாவிடமிருந்த ஒரு பவுன் தாலியை கழற்றிக்கொடுக்கச் சொன்ன சாமியார் தாலியை ஒரு புளி உருண்டைகள் வைத்து உருட்டி பிரியாவின் கையில் கொடுத்துள்ளார். இந்த உருண்டையை எடுத்துக்கொண்டு நாளை காலை கரூர் ஈஸ்வரன் கோயிலுக்கு வரும்படி சொல்லிவிட்டு சென்றுள்ளார்.

அடுத்தநாள், புளி உருண்டையை எடுத்துக்கொண்டு போன ஆறுமுகம் பிரியாவிடம் இருந்து புளி உருண்டையை வாங்கிய சாமியார், அவர்களுக்கு சிறப்பு பரிகார பூஜை செய்துள்ளார். அப்போது புளி உருண்டையை இரு உருண்டையாக பிடித்துக்கொண்டு ஒரு உருண்டைக்குள் உங்கள் சங்கிலி உள்ளது. அதனை சாமி அறைக்குள் வைத்து பூஜை செய்யுங்கள் தோஷம் கழிந்துவிடும், மறு உருண்டையை நான் எடுத்துச்சென்று பூஜை செய்கிறேன் எனக்கூறிவிட்டு புளி உருண்டையுடன் அங்கிருந்து சென்றுவிட்டார்.

சாமியார் போனபிறகு, புளி உருண்டையை உடைத்துப்பார்த்தபோது அதில், பிரியாவின் தாலி இல்லை. இதையடுத்து ஆறுமுகம் அப்பகுதியில் இருந்த பொதுமக்களின் உதவியுடன் சாமியாரை துரத்திப்பிடித்து கரூர் நகர காவல் நிலையத்தில் ஒப்படைத்தனர்.

இதன்பின்னர் போலீஸார் மேற்கொண்ட விசாரணையில், தாலி நிலைக்க பரிகாரம் செய்தசாமியார், திருச்சி மாவட்டம் தொட்டியம் அரங்கனூரைச் சேர்ந்த சரவணன் (வயது-37) என்பதும், இவர் போலி சாமியார் என்பதும் தெரியவந்தது. இதையடுத்து போலீஸார் அவரை கைதுசெய்து விசாரித்து வருகின்றனர்.
 
Support : Creating Website | Johny Template | Mas Template
Copyright © 2011. tamiltvshows - All Rights Reserved
Template Created by Creating Website Published by Mas Template
Proudly powered by Free Blogger Template